कोशी प्रदेश नाम खारेजीको माग गर्दै प्रमुख शहरहरुमा राँके जुलुस

 लिम्बुवान न्युज
                       

दमक, २७ फागुन । प्रदेश नं. १ पुनः नामाकरण संघर्ष संघर्ष समितिले कोशी प्रदेश नाम खारेजीको माग गर्दै शनिबार साँझ प्रदेशको प्रमुख सहरहरुमा राँके जुलुस निकालेको छ । फागुन १७ गते प्रदेशको नामाकरण घोषणा भएसँगै प्रदेशमा पहिचानवादी दल र संघसंगठनहरु आन्दोलनमा उत्रिएका छन् ।

संघर्ष समितिको अगुवाईमा ताप्लेजुङको फुङलिङ, पाँचथरको फिदिम, इलामको इलामबजार, माङ्सेबुङ, झापाको विर्तामाड, दमक, भद्रपुर, मोरङको विराटनगर, उर्लाबारी, पथरी, लेटाङ र बेलबारी, सुनसरीको इटहरी र धरान, धनुकटाको धनकुटाबजार, तेह्रथुमको मेयङलुङ, भोजपुरको भोजपुरबजार, उदयपुरको गाइघाट, खोटाङको दिक्तेल, ओखलढुंगाको ओलढुंगा, सखुवासभाको चैनपुर लगायत दर्जनौं स्थानमा हजाराैंकाे उपस्थितिमा राँके जुलुस प्रदर्शन गरेको हो ।

प्रदर्शनकारीहरुले कोशी प्रदेश खारेज गर, पहिचानबादी एक होऔं, ऐतिहासिक पहिचानको आधारमा प्रदेशको पुनः नामाकरण गर लगायत नारा लगाउँदै राँके जुलुस गरेका छन् । विर्तामोड लगायत केही स्थानमा राँके जुलुस प्रदर्शनको क्रममा प्रहरी र प्रदर्शनकारीबीच केही बेर घम्साघम्सी समेत भएको थियो । सो क्रममा  प्रशर्दनकारी र सुरक्षाकर्मीहरु सामान्य घाईते भएको संघीय लिम्बुवान प्रान्तीय मञ्च झापा जिल्ला उपाध्यक्ष राजा अाङ्थुप्पेले बताए । बाँकी स्थानमा भने कुनै अप्रिय घटना नभएकाे बताइएकाे छ ।

संघर्ष समितिका अगुवा नेताहरुले विभिन्न कोणसभामा कोशी प्रदेश खारेजीको माग राख्दै प्रदेशको पुनः नामाङकन नगरिए थप शसक्त आन्दोलन गर्ने चेतावनी दिएका छन् । पहिचान नामेट पार्ने षडयन्त्रकारी प्रदेश १ का प्रदेश सदस्यहरुलाई गृह जिल्लामा रोक लगाउन समेत उनीहरुले माग गरेका छन् । मुख्य गरी आदिवासी जनजाति प्रदेश सदस्यहरुले पहिचान मेटने कार्य गरेकोमा इतिहासले उनिहरुलाई कहिल्यै विर्सने छैन वक्ताहरुले भनेका छन् ।
संघर्ष समितिले भोलि फागुन २८ गते प्रदेशव्यापी आम हड्ताल घोषणा गरेसँगै अघिल्लो दिन आज राँके जुलुस गरेको हो । संघर्ष समितिले आगामी चैत्र ५ गते विराटनगरमा बृहत जनप्रदर्शन समेत गर्ने निर्णय गरेको छ ।

लिम्बुवान किरात संयुक्त संघर्ष समिति साथै पहिचान सहितको प्रदेश नं. को १ पुनः नामाकरण अभियान समिति, किरात याक्थुङ् चुम्लुङ र किरात राई यायोक्खा केन्द्रीय समितिको संयोजनमा मंगलबार र बुधबार (फागुन २३, २४) भएको बैठकले सो निणर्य गरेको हो । अन्दोलनरत समितिहरुको बैठकले संघर्ष समितिको नाम परिवर्तन गर्दै प्रदेश नं. १ पुनः नामाकरण संघर्ष संघर्ष समिति राखिएको चुम्लुङ संघीय अध्यक्ष प्रेम एक्तेनले जनाए । बैठकमा किरात राई यायोक्खा उपाध्यक्ष जनक राई, किरात सगरमाथा नामाकरण शान्तिपूर्ण नैतिक दबाब समितिका अध्यक्ष डकेन्द्रसिंह थेगिम, आदिबासी जनजाति महासंघको पूर्ब महासचिव आङ्काजी शेर्पा, संघीय लोकतान्त्रिक राष्ट्रिय मञ्चका केन्द्रीय अध्यक्ष कुमार लिङ्देन, जनता समाजवादी पार्टीका रमेश राई, लिम्बुवानका नेता सञ्जुहाङ पालुङ्वा, खम्बुवान राष्ट्रिय मोर्चाको केन्द्रीय उपाध्यक्ष दिलराम राई, किरात लिम्बुवान नामकरण दबाब समुहको अध्यक्ष प्रेमदिप थाम्सुहाङ लगायतको उपस्थिति रहेको थियो । बैठकमा समाजिक तथा राजनीतिक संगठनका नेताहरुले आन्दोलनको उठान, प्रभाव, सम्भावना र चुनौतीहरु बारे बोलेका थिए ।

आन्दोलनमा गोपाल किराती नेतृत्वको संगठन, मंगोल नेशनल अर्गनाइजेसन, कोच, धिमाल, याक्खा, सुनुवार, पहिचान पक्षधर एमाले, कांग्रेस, माओवादी लगायतका घटक संगठनहरुलाई जोड्दै जाने र प्रदेश नंंं.१ को मात्र नभएर बाँकी छ वटै प्रदेशको पुनः नामाकरणको मुघा उठाउन पहल गर्नुपर्ने वक्ताहरुले बिषय राखेका थिए ।

फागुन २४ काठमाडौंमा अध्यक्ष गेल्जे लामा शेर्पाको सभापतित्वमा बसेको नेपाल आदिबासी जनजाति महासंघ संघीय समितिको बैठकले १ नं. प्रदेशको आन्दोलनलाई नैतिक र भौतिक समर्थन, सहयोग गर्ने निणर्य भएको महासचिव दिवस राईले बताए । प्रदेश नं. १ को नाम कोशी खारेजीको लागि हुने आन्दोलनमा सहभागी हुन महासंघको १ नं. प्रदेश, जिल्ला समितिहरुलाई सर्कुलर जारी गरिएको महासंघले जनाएको छ । महासंघले न्याय र स्वतन्त्रताको आन्दोलन गाउँगाउँबाट गठन र उठाउन आव्हान समेत गरेको छ ।

यसैगरी भोलि आइतबार मध्यान्ह १२ बजे माइतीघर मण्डलामा प्रदेश नं. १ को पुनः नामाङ्कनको माग गर्दै विभिन्न जातीय संघसंस्थाहरुको उपस्थितिमा प्रर्दशन गरिने महासंघले जनाएको छ ।

सम्बन्धित समाचार

इलाममा फागुन २४ देखि २५औं राष्ट्रिय चुम्लुङ हुँदै: याक्थुङ सांस्कृतिक महाेत्सव पनि हुने

ललितपुर, २२ फागुन । किरात याक्थुङ् चुम्लुङको २५औं राष्ट्रिय चुम्लुङ इलाममा यही फागुन २४ र २५ गते आयोजना हुने भएको छ । चुम्लुङको २५ औं राष्ट्रिय चुम्लुङको अवसरमा आदिवासी याक्थुङ/लिम्बू साँस्कृतिक महोत्सव हुने भएको छ...

फाल्गुन १७ प्रदेश १ को अध्यारो दिन, १ बर्ष पुरा

दमक, १८ फाल्गुन । १ नम्बर प्रदेशको नामाङकन पहिचान नामेट हुनेगरी कोशी प्रदेश कायम गरिएको १७ फाल्गुनमा एक वर्ष पूरा भएको छ । गत वर्षको फागुन १७ गते प्रदेश १ को नाम प्रदेश सभाले चोरबाटोबाट...

दमकमा आजबाट दुई दिने याक्थुङ साम्लो महोत्सव हुँदै

दमक, १८ फाल्गुन । झापाको दमक ७ स्थित पशुहाटमा आज(शुक्रबार)बाट दुईदिने याक्थुङ साम्लो महोत्सव २०८० सुरु हुदैंछ । याक्थुङ् लिम्बू कलाकारहरुको गौरवशाली छाता संगठन फक्ताङलुङ साँस्कृतिक मञ्च केन्द्रीय कार्य समितिको आयोजनामा आज र भोलिसम्म सञ्चालन...

मनकुमार तुम्सा कियाचु जापानकाे अध्यक्षमा निर्वाचित

जापान । किरात याक्थुङ चुम्लुङ जापानको छैटौँ महाधिवेशन भव्यताका साथ सम्पन्न भएको छ। टोकियो ओकुबो स्थित काठमाडौँ लञ्च एण्ड बारमा सम्पन्न महाधिवेशनले मन कुमार तुम्साको नेतृत्वमा २५ सदस्यीय नयाँ कार्यसमिति चयन गरेको छ । कियाचु...