दमक, १३ चैत्र । किरात याक्थुङ चुम्लुङका अध्यक्ष प्रेम येक्तेनले पूर्वघोषित आन्दोलनका कार्यक्रमहरू निरन्तर रहेको बताएका छन् । प्रदेश नं १ पुनः नामाङकन संयुक्त संघर्ष समितिलाई संघीय सरकारसँग वार्ता गर्ने बारेमा कुनै जानकारी नभएको भन्दै अध्यक्ष येक्तेनले कुनै भ्रममा नपरी अझ स–सशक्त आन्दोलन गर्न आह्वान गरेका हुन् ।
येक्तेनले सामाजिक संजाल फेसबुकमा लेख्दै भनेका छन्, ‘वार्ताको कुनै जानकारी संघर्ष समितिलाई छैन । यी पूर्वघोषित आन्दोलनका कार्यक्रमहरु हरेक स्थानमा हरेक दिन ससक्त र अझ कडा रुपमा बढाउनुहुन सम्पुर्णमा अनुरोध गर्दछु । सबै आन्दोलनकर्मीहरूमा वार्ताको भ्रममा नपर्नुहुन अनुरोध गर्दछु ।’
पदम लिम्बु लाजेहाङलाई राष्ट्रिय शहीद घोषणा गर्न र क्षतिपूर्ति दिने सरकारलाई माग गर्दै कोशी प्रदेश नाम खारेजी नभई शव नबुझ्ने संघर्ष समितिले जनाएको छ । लाजेहाङ आबद्ध पार्टी संघीय लोकतान्त्रिक राष्ट्रिय मञ्चका अध्यक्ष कुमार लिङदेन मिराकले लाजेहाङलाई शहीद घोषणा नगरिए अर्को विद्रोह शुरु हुने चेतावनी दिएका छन् । उनले पहिचानको आन्दोलनलाई कमजोर नठाउन्न सरकारलाई चुनौती दिदैं कोशी खारेजी नगरिएमा देशमा युद्ध हुने बताए । यसैगरी सहित्यकार राजन मुकारुङ्, कियाचू महासचिव निरन्ती तुम्बापो लगायत विभिन्न राजनीति कर्मी, अभियान्ताहरुले समेत सामाजिक संजाल मार्फत विरोध जनाएका छन् ।
गत चैत ५ गते कोशी प्रदेश नामकरणविरुद्ध बिराटनगरमा भएको विशाल जनप्रदर्शनको क्रममा प्रहरीको लाठीचार्जबाट घाइते भएका पदम लिम्बु सुक्वाबा लाजेहाङको उपचारको क्रममा शुक्रबार मृत्यू भएको छ । लाजेहाङको मृत्यु पछि संघर्ष समितिले चरणबद्ध आन्दोलनको कार्यक्रमहरु घोषणा गरेर सडकमा उत्रिएका छन् । शुक्रबार कोणसभा, शनिबार चक्काजाम, आइतबार देखि मंगलबारसम्म स्थानीय पालिकाहरुमा ज्ञापनपत्र र १४ गते देखि १७ गतेसम्म पालिकाहरुमा तालावन्दी लगायतका कार्यक्रमहरु संघर्ष समितिले सार्वजनिक गरेको छ ।
यसैवी शनिबार संयुक्त संघर्ष समितिका प्रतिनिधि मण्डलले प्रधानमन्त्री पुष्पकमल दाहाललाई ज्ञापनपत्र बुझाएका छन् । सो लगत्तै लाजेहाङको घटनाका बारेमा छानबिन गर्न संघीय गृह मन्त्रालयले शनिबार गृहमन्त्रालयका सहसचिवको संयोजकत्वमा ६ सदस्यीय छानबिन समिति गठन गरेको थियो । सो समिति गठनको संघर्ष समितिले आपत्ती जनाएको छ ।