ललितपुर, २१ फाल्गुन । मुक्कुमलुङ ताङसेःप चुम्भो र मुक्कुमलुङ संरक्षण अन्तरदलीय संयुक्त संघर्ष समितिको संयुक्त आयोजनामा काठमाडौंस्थित माईतीघर मण्डलामा आज विरोधसभा हुँदैछ । लिम्बु याक्थुङहरुको पवित्र मुन्धुमी सांस्कृतिकस्थल मुक्कुलुङ्मा केवलकार निर्माण शुरुभएसँगै नो केवलकार पक्षले निरन्तर आन्दोलन गरिरहेका छन् ।

फाल्गुन ६ देखि ८ गतेसम्मको मुक्कुमलुङ पदयात्रा सम्पन्न पश्चात केवलकार निर्माणको वटमस्टेष्टमा धर्नादिने क्रममा प्रहरी र आन्दोलनरत पक्षबिच भएको झडपबाट दर्जनौं घाइते भएको । अमानवीय व्यवहावहार गरि क्रुर तानाशाही शैलीबाट आन्दोलनरत पक्षलाई दवाउने प्रयास सँगै पक्राउ गरिएको, फाल्गुन १० गते फुङलिङमा विरोध¥याली र शान्तिपूर्ण राँकेजुलुस पछि आन्दोलनरत पक्षलाई घरघर पुगेर प्रहरी र केवलकार निर्माण पक्षकाहरुले दमन गरेको प्रति विरोध जनाउँदै काठमाडौंमा संघर्ष समितिले विरोध सभाको आयोजना गरेको हो ।

दिउँसो २ बजे हुने कार्यक्रममा उक्त आन्दोलनमा घाइते भएकाहरुको तस्वीर सार्वजनिक गर्ने साथै पक्राउ परेका १८ जना भन्दा धेरै योद्धाहरु र हालसम्म अपरण तथा बेपता पारिएकाहरु सावर्जनिक गर्न राज्यलाई आव्हान गर्नसमेत कार्यक्रमको आयोजना गरिएको किरात याक्थुङ चुम्लुङका महासचिव निरन्ती तुम्बापोले बताइन् ।

फाल्गुन १० गते महिलाहरुमाथिको ज्यादती अमानवीय र क्रुर तानाशाह शासनभन्दा पनि भएको उनले बताउँदै अब पनि राज्यले आन्दोलनकारीमाथि दमन गरे आन्दोलनले तेस्रो जनआन्दोलनको रुप लिन सक्ने वताइन् ।
राज्य पक्षले आदिवासी जनजातिमाथि अपमान गरेको, हेपेको र उनीहरुको अधिकार खोस्ने कार्य भएको छ । त्यो किमार्थ मान्य नहुने बताउँदै भनिन् “बरु हामी रगत बगाउन तयार छौं, जेल बस्न तयार छौं तर मुक्कुमलुङ माथि भएको अतिक्रमण, मुन्धुमी संस्कृतिमाथि भएको दमन र याक्थुङहरुको माङगेन्ना ढाल्न दिने छैनौं ।”

कार्यक्रममा नेपाल आदिवासी जनजाति महासंघ साथै अन्य जातीय घटक सदस्यहरु, मधेशवादी दल, पहिचान पक्षधर पार्टीहरु, नागरिक समाज, सामाजिक अभियन्ता तथा कानुन विज्ञ र बरिष्ठ साहित्यकारहरुको समेत उपस्थिति रहने किरात याक्थुङ चुम्लुङका संघीय उपाध्यक्ष गोविन्द आङबुङले बताए ।