ललितपुर, ४ चैत्र । मुन्धुमी आस्थाको केन्द्र धार्मिक पवित्रस्थल मुक्कुमलुङ संरक्षणका लागि सिंहदरबार घेराउ गरिने भएको छ । मुक्कुमलुङमा केवलकार निर्माण जबरजस्ती प्रहरी प्रशासनको संरक्षणमा सरकारले गर्न थालेपछि आन्दोलन निरन्तर गरिरहेको संघर्षरत संगठनहरुले सिंहदरबार घेराउ कार्यक्रम आयोजना गेको हो ।

चैत्र ६ गते मुक्कुमलुङ ताङ्सेःप चुम्भो र मुक्कुमलुङ संरक्षण अन्तरदलीय संयुक्त संघर्ष समितिको संयुक्त आयोजना उक्त कार्यक्रम गरिने भएको ताङसेःपकी नेतृ सरु सिंगकले वताइन् । मुक्कुमलुङ संरक्षणका लागि मुक्कुमलुङमा नो केवलकार भन्ने नाराका साथ कार्यक्रम आयोजना गरिएको उनले वताइन् ।

मुन्धुमी आस्थाको केन्द्र राज्यद्वारा नै अतिक्रमण भएको हुँदा सोको विरुद्ध आन्दोलन भईरहेको पहिचानवादी नेता खगेन्द्र माखिम बताउँछन् । राज्य आतंक जबसम्म रहन्छ यो आन्दोलन रोकिनेवाला नभएको उनको जिकीर रहेको छ । दलाल पुँजीवादीहरुको विरुद्ध, बर्बर दमनको विरुद्ध संघर्ष जारी राख्ने उनले बताए ।

मुक्कुमलुङ गोली काण्डको उचित छानविन गर्न, केवलकार निर्माण कर्ताका भिजिलान्तेहरुको संरक्षण राज्यले गरेको र मुक्कुमलुङ मुन्धुमीस्थलमा अपराधीकरण शैलीबाट राज्य आतंक बढेको विरुद्ध चैत्र ६ गते सिंहदरबार घेराउ गर्दै राज्यलाई सचेत गराउन लागिएको नेता माखिमले बताउनु भयो ।

मुक्कुमलुङ ताङसेःप चुम्भो र अन्तरदलीय संघर्ष समितिले संयुक्त रुपमा कार्यक्रमको आव्हान गर्दै काठमाडौं उपत्यकामा रहेका सबै पहिचान पक्षधर नागरिकलाई कार्यक्रममा सरिक भईदिन अपिल समेत गरेका छन् । संघर्ष समितिहरुमा विभिन्न दल र संघ संस्थाहरु आवद्ध रहेका छन् ।