ललितपुर, १७ फाल्गुन । प्रदेश नं. १ मा रहेको पहिचान पक्षधरहरुले मुक्कुम्लुङ संरक्षण, कोशी नाम खारेजी तथा मुक्कुम्लुङ क्षेत्रमा प्रस्तावित केवलकार परियोजनाको विरोध गर्दै दल तथा उम्मेदवारलाई मत नदिन मतदातासँग अपिल गरेका छन् ।
शनिबार किरात याक्थुङ चुम्लुङको संघीय कार्यालय लालितपुरमा मुक्कुमलुङ ताङसेप चुम्भो, मुक्कुम्लुङ संरक्षण अन्तरदलीय संघर्ष समिति तथा प्रदेश नं १ पुनःनामाङ्कन संयुक्त संघर्ष समितिले संयुक्त रूपमा पत्रकार सम्मेलन गर्दै अपिल गरेका हुन् ।
एक विज्ञप्ति जारी गर्दै मुख्य तीन एजेण्डाहरु मुक्कुमलुङ संरक्षण तथा बचाउ, मुक्कुम्लुङ क्षेत्रमा प्रस्तावित केवलकार परियोजना खारेजी र प्रदेश नं. १ को नाम ‘कोशी’ खारेजको एजेण्डा अघि सार्दै ती एजेण्डामा प्रतिबद्धता नजनाउने दल तथा उम्मेदवारलाई ताप्लेजुङ जिल्लाबासी मतदाताहरुलाई आव्हान गरेको हो ।
उनीहरुले पार्टी र जातिभन्दा माथि उठेर आफ्नो मुद्दामा स्पष्ट अडान लिने उम्मेदवारलाई समर्थन गर्न आग्रह गरेका छन् । समितिले आगामी प्रतिनिधिसभा निर्वाचन–२०८२ लाई आफ्ना एजेण्डा स्थापित गर्ने अवसरका रूपमा लिएको बताएका छन् ।
उनीहरूले दशकौंदेखि मुक्कुम्लुङ क्षेत्र संरक्षणका लागि संघर्ष गर्दै आएको उल्लेख गर्दै आन्दोलनका क्रममा राज्य पक्षबाट दमन, कुटपिट, पक्राउ, मुद्दा तथा पक्राउ पुर्जी जारी गर्ने काम भएको आरोप लगाएका छन् ।
साथै, अदालतमा मुद्दा विचाराधीन रहेकै अवस्थामा समेत दमन जारी रहेको भन्दै असन्तुष्टि जनाएका छन् । देशमा बढ्दो भ्रष्टाचार, कुशासन र राजनीतिक बेथितिविरुद्ध जनआक्रोश बढेको उल्लेख गर्दै आन्दोलनकारीहरूले २०८२ भदौ २३ र २४ गते भएको ‘जेन्जी आन्दोलन’ पछि राजनीतिक परिवर्तनको माग तीव्र भएको उनीहरुको भनाई रहेको छ ।

हेर्नुहाेस् विज्ञप्तिः