इटहरी। संघीय दलित मुक्ति मञ्च, नेपालले आयोजना गर्ने भनिएको आमसभा स्थगित गरेको छ । संघीय लोकतान्त्रिक राष्ट्रिय मञ्च अन्तर्गतको मञ्चले यहि चैत्र २१ गते इटहरीमा ऐतिहासिक वृहत सभा गर्ने तयारी गरेको थियो ।

बुधबार एक विज्ञप्ति जारी गर्दै विश्वव्यापी रुपमा पुनः दोस्रो लहरमा कोभिड–१९ फैलिन थालेपछि नेपाल सरकारले पनि सबै प्रदेशहरुमा सभा सम्मेलन गर्न बन्देज गरेसँगै सभा स्थगित गर्नु परेको हो ।

जनताको स्वास्थ्य सुरक्षालाई ध्यानमा राख्दै स्वास्थ्य मन्त्रालय, जिल्ला प्रशासन कार्यालय र सबै स्थानीय तहहरु मार्फत सूचना, माइकिङ्द्वारा जनतालाई सुरक्षित रहन अपिल गरेसँगै ठूलठूला कार्यक्रमहरु गर्न समेत रोक लगाएपछि वृहत रुपमा तयारी गरिएको दलित मञ्चको कार्यक्रम हाललाई स्थागित गरिएको विज्ञप्तिमा उल्लेख गरिएको छ ।

तेह्र प्रतिशत भन्दा धेरै दलितहरु राजनीतिक रुपमा शसक्त उठ्न नसकेको भन्दै राजनैतिक लडाई लढ्न र सिंहदरबारमा दलित समुदायलाई उल्लेख्य रुपमा प्रवेश गराउने लडाई लढिरेहका दलित मुक्तिको अन्तिम विकल्प भनेकै गैरभौगोलिक प्रान्त स्थापना गर्ने लक्ष्य रहेको विज्ञप्तिमा भनिएको छ । त्यसैगरी विज्ञप्तिमा संघीय मञ्चको १०+१ प्रान्तीय अवधारणा अन्तर्गत दलित समुदायको मागलाई राज्यले सम्बोधन गर्नु पर्ने जनाइएको छ ।