लिम्बुवानखबर। कोभिड– १९ विरुद्धको राष्ट्रिय खोप अभियान अन्तर्गत नेपालमा रहेका भुटानी शरणार्थीहरुलाई कोरोना खोप लगाइएको छ ।
६५ बर्ष माथिका ज्येष्ठहरुलाई सरकारले लगाउने खोप अभियान कार्यक्रम अन्तर्गत झापा र मोरङमा बस्दैआएका ६५ बर्ष माथिका ६६८ जना वृद्धवृद्धाहरुलाई खोप लगाइएको हो ।

दमकको बेलडाँगीस्थित भुटानी शरणार्थी शिविरमा यसैसाता सञ्चालन भएको दोश्रो चरण खोप अभियानमा सो संख्याका शरणार्थीहरुले खोप लगाएको शिविर व्यवस्थापन समितिले जनाएको छ ।

खोप आपूर्तिभए अन्य शरणार्थीहरुलाई पनि क्रमशः खोप लगाउँदै जाने तयारी रहेको शरणार्थी सम्बन्धी संयुक्त राष्ट्रसंघीय उच्चायोगको कार्यालयले जनाएको छ । नेपाल सरकारले सञ्चालन गरेको खोप अभियानमा शरणार्थीहरुलाई पनि समेटेर खोप लगाउने हालसम्म नेपाल पहिलो देश बनेको बताइएको छ ।