माङसेबुङ । किरात धर्म सम्बद्ध युवाहरुको संगठन किरात साम्यो नालीफूङवा मुजोत्लुङ पान्जुम्भोको पाँचौं महासम्मेलनको उदघाटन कार्यक्रम भएको छ । आइतबार इलामको धार्मिक पर्यटकीय तिर्थस्थल माङसेबुङमा किरात चोत्लुङ मुहिङगुम अङसीमाङगेन्ना सेवा समितिका अध्यक्ष केहेरसिं योङहाङको प्रमुख आतिथ्यतामा उद्घाटन कार्यक्रम भएको हो ।
कार्यक्रममा नालिफुङवा मुजोत्लुङ पान्जुम्भोका संस्थापक पदाधिकारीहरुलाई सम्मान गरिएको छ । पान्जुम्भोका संस्थापक उपाध्यक्षद्धय डिल्ली थेबे, हृदय थेगिम र सचिव भगिहाङ नेम्बाङलाई पान्जुम्भोले सम्मान गरेको छ ।
पान्जुम्भोले संस्थापक पदाधिकारीहरुलाई सम्मान गर्ने कार्यक्रम अन्तर्गत विगतमा स्थापना दिवसहरुको अवसरमा संस्थापक अध्यक्ष नन्दकुमार नेम्बाङ, संस्थापक उपाध्यक्ष तथा निवर्तमान अध्यक्ष वनेम विक्रम फागोलाई सम्मान गरिसकेको सचिव योगेश लाओतीले बताए ।
सम्मान गर्ने क्रममा किरात लिम्बू भाषालाई स्थानीय सरकारी कामकाजी भाषाको रुपमा माङसेबुङ वडा नं. ५ मा लागू भएसँगै प्रसासनिक फाँटमा पहिलो कर्मचारी भाषा सचिवको रूपमा नियुक्ती हुनु भएका किरात साम्यो नालीफुङवा मुजोत्लुङ पान्जुम्भोका पूर्व सदस्य सुनिल सेर्मालाई पनि सम्मान गरिएको छ ।
यसरी नै पान्जुम्भोको स्थापना दिवसको अवसरमा हरेक वर्ष २ जनालाई प्रदान गर्दै आएको ‘नालीफुङवा जुझारु पुरस्कार २०७७’ द्वारा किरात साम्यो नालीफूङवा माङसेबुङ पान्जुम्भोका अध्यक्ष बाइसकुमार राई र पान्थर मिक्लाजङ ५, कुरुम्बा निवासी रेनुका लाओती पुरस्कृत भएका छन् ।
समुद्घाटन कार्यक्रममा अङसीमाङगेन्ना सेवा समितिका उपाध्यक्ष होमबहादुर लिङ्देन, समितिका महासचिव काकीराम लाओती, नालीफूङवाका संस्थापक अध्यक्ष नन्दकुमार नेम्बाङ, किरात साम्यो साक्थिम्गेन मुजोत्लुङ पान्जुम्भोका उपाध्यक्ष ज्ञानु केदेम लगायतले शुभकामना मन्तव्य राखेका थिए ।
महासम्मेलनमा पान्जुम्भोको मातहत निकाय थुम पान्जुम्भो र पाङभे पान्जुम्भोबाट प्रतिनिधि तथा पर्यवेक्षको रुपमा सहभागि रहेको जनाइएको छ । सोमबार सम्पन्न हुने महासम्मेलनको बन्द सत्रमा पान्जुम्भोको सांगठनीक, आर्थिक प्रगति प्रतिवेदन र भावि कार्य योजनाहरु प्रस्तुत गरेर पारित गरी सकेपछि नयाँ नेतृत्व चयन गर्दै महासम्मेलन सम्पन्न हुने पान्जुम्भोका अध्यक्ष दिपक तिगेलाले बताए ।
समुद्घाटन कार्यक्रमलाई पान्जुम्भोका उपाध्यक्ष प्रितिमान खालिङले स्वागत गरेका थिए भने कार्यक्रम सचिव योगेश लाओतीको संचालनमा भएको थियो । कार्यक्रमको सभाध्यक्षता पान्जुम्भोका अध्यक्ष दिपक तिगेलाले गरेका थिए ।
(तस्वीरः माङसेबुङ न्यूजबाट)
Related