ताप्लेजुङ। संघीय लोकतान्त्रिक राष्ट्रिय मञ्च सम्बद्ध संघीय लिम्बुवान मञ्च, नेपालको प्रवास समितिहरुद्वारा संकलित रकम ताप्लेजुङ् दोभानका अग्निपिढीत ५८ घर परिवारलाई राहत वितरण गरेको छ । संघीय लिम्बुवान सामाजिक मन्च, प्रवास कार्य समिति युकेको विशेष पहलमा अन्य प्रवा समितिहरु इजरायल, कतार, मलेसिया, कोरिया, बहराइनद्वारा संकलित रकम ९ लाल ७८ हजार ३१० रुपैयाँ ताप्लेजुङ दोभानको आगलागी पिडितहरुलाई हस्तान्तरण गरिएको हो ।

मञ्चका संघीय अध्यक्ष कुमार लिङ्देन मिराकको उपस्थितिमा सो रकम वितरण गरिएको छ । ५६ घर परिवारलाई १७ हजारका दरले र थप दुई परिवारलाई १२ हजार ७ सय २० का दरले रकम प्रदान गरिएको छ ।

संघीय लिम्बुवान सामाजिक मञ्च, प्रवास यूकेको उपाध्यक्ष शर्मिला यक्सोको विशेष सक्रियतामा यूकेबाट ५ लाख ३६ हजार ७ सय, इजरायलबाट १ लाख ८० हजार ७ सय ४५, कतारबाट १ लाख ३७ हजार ८ सय ६५, बहराइनबाट ५३ हजार, कोरियाबाट ३० हजार, मलेसियाबाट ४० हजार रकम संकलन भएको थियो ।

राहत वितरण कार्यक्रममा मञ्चका उपाध्यक्ष विष्णु तुम्बाहाम्फे, राहत संकलन संयोजक प्रवास युकेका उपाध्यक्ष शर्मिला यक्सो, लिम्बुवान मञ्चका ताप्लेजुङका केन्द्रीय नेताहरु त्यसैगरी जिल्ला अध्यक्ष लगायत नेताहरुको उपस्थिति रहेको थियो भने मेरिङ्देन गाउँपालिकाका कर्मचारी रोशन शाह, राहत वितरण समितिका सदस्य हरिप्रसाद काफ्लेको उपस्थितिमा पिढीतहरुलाई रकम हस्तान्तरण गरिएको छ ।

राहत वितरण कार्यक्रममा बोल्दै अध्यक्ष लिङदेनले सहयोग गर्नुहुने प्रवास समितिहरुलाई धन्यवाद दिएका छन् भने पिढीत परिवारहरुलाई राज्यले तुरुन्त घर पुनःनिर्माणमा पहलकदमी चाल्न अनुरोध गरेका छन् । कार्यक्रममा गाउँपालिकाका जनप्रतिनिधिहरु, उद्योग वाणिज्य संघका प्रतिनिधिहरुको उपस्थिति रहेको थियो ।