काठमाडौं । कोभिड १९ को संक्रमण उच्च जोखिममा रहेको २१ जिल्लाहरुमा निषेधाज्ञा जारी गरेसँगै सरकारले आजबाट थप कडाइ गर्न थालेको छ । बिहीबार पहिलो दिन केही खुकुलो गरिए पनि आजबाट कडाइ गरिने गृहमन्त्रालयका अधिकारीको भनाइ छ ।

गृह मन्त्रालयका प्रवक्ता जनकराज दाहालले काठमाडौं उपत्यकामा पहिलो दिन निषेधाज्ञा केही खुकुलो बनाए पनि आजबाट कडाइ गरिने बताए । ट्राफिक जामका कारण बाटोमै अड्किएका गाडी र तिनमा सवार यात्रुहरु समस्यामा परेकाले केही खुकुलो बनाइए पनि अब कडाइ गरिने उनको भनाइ छ ।

कोभिड–१९ को उच्च संक्रमण रहेका र आंशिक भएका जिल्लाहरुमा पूर्ण तथा आंशिक निषेधाज्ञा जारी भएको छ । दाङ जिल्लामा पनि पूर्ण निषेधाज्ञा लागू भएको छ तर गृह मन्त्रालयले शुक्रबार सार्वजनिक गरेको जिल्लाहरूको विवरणमा दाङ उल्लेख छैन ।

काठमाडौं उपत्यकामा विहीबार बिहान ६ बजेदेखि एक साताका लागि निषेधाज्ञा जारी गरिएको छ । निषेधाज्ञा पालना गराउन ठाउँ–ठाउँमा प्रहरी टोली परिचालन गरी सवारी साधन जाँच गरिएको छ । सरकारले निषेधाज्ञा पालना गर्न सर्वसाधारणलाई अनुरोध गर्दै आएको छ । काठमाडौं उपत्यकामा अस्थायी रुपमा बसोबास गर्ने सर्वसाधरणलाई घर फर्कन भने अहसज भएको छ ।