झापा, १ बैशाख । झापाको कमल ६ स्थित जिम्दार चोकमा सिरुवा सांस्कृतिक मेला आदिवासीहरुले धुमधामसँग मनाएका छन् । हरेक नयाँ बर्षको दिन मनाईदै आईरहेको सिरुवा मेला यो बर्ष २०७९ को अवसर पारेर यसवर्ष पनि धुमधामका साथ लागेको हो ।

कोरोना महामारीका कारण दुई वर्षदेखि रोकिएको सिरुवा मेला यसवर्ष भने जोखिम केहि सहज भएसंगै लगाइएको स्थानीय सत्यनारायण ताजपुरियाले बताए । उनका अनुसार विहानैदेखि मेलामा टाडाटाडाबाट आएका तीर्थालु तथा अवलोकनकर्ताहरुको बाक्लो उपस्थिति रहेको छ ।

प्रकृतिपूजक पूर्वका रुपमा मानिने यो पर्व विशेष गरेर आदिवासी ताजपुरियासहित धिमाल, राजवंशी लगायतका जातीले नयाँ बर्षका दिन सामूहिक रुपमा सिरुवा पर्व मनाउदैआएको र त्यसै पर्वको अवसरमा बर्षोदेखि त्यहाँ सांस्कृतिक मेला लाग्दैआएको स्थानीय समेत रहेका नेपाल आदिवासी जनजाति महासंघका पूर्व केन्द्रीय महासचिव नित्यानन्द ताजपुरियाले बताए ।

उनका अनुसार विहानै त्यहाँको महाराजथानमा पूजाआजा गर्नुका साथै एकापसमा हिलो खेलेर शुभकामना आदानप्रदान गरिएको छ । पर्वमा लाग्दैआएको सांस्कृतिक मेलामा ठुलो संख्यामा दर्शानार्थीहरुको घुईचो लागेको छ । मेलामा स्थानीय घरेलु उत्पादन तथा खेल तमासाहरु राखिएका थिए ।

आदिवासी बाहुल्य रहेको झापा र मोरङको विभिन्न स्थानहरुमा पनि सांस्कतिक मेला लाग्दैआएको छ । (तस्वीरः प्रदेशवाणीबाट)