लिम्बुवानखबर। नेपाल पत्रकार महासंघ झापा शाखाले कोरोना भाइरसबाट संक्रमति पत्रकारलाई सहज उपचारको लागि सहयोग गर्ने भएको छ ।
शुक्रबार बसेको महासंघको बैठकले संक्रमित पत्रकारलाई घरमै चिकित्सकको परामर्श अनुसार पोषिलो खानेकुरा, मास्क, सेनिटाइजर र आवश्यकता अनुसार अक्सिजन सिलिण्डर निःशुल्क उपलब्ध गराउने निर्णय गरेको हो ।
बैठकले पत्रकारको पीसीआर परीक्षण, आवश्यक परे अस्पताल भर्ना, औषधि व्यवस्थापन, चिकित्सकको मनोपरामर्श, कोरोनाविरुद्धको खोप लगाउन छुटेका पत्रकारहरुका लागि खोप व्यवस्थापन लगायतका कार्यमाखसहजीकरण गर्ने र सो का निम्ति सरकारी पक्षसँग माग गर्ने समेत निर्णय गरेको हो ।
श्रमजीवी पत्रकार तथा सञ्चारगृहमा उत्पन्न हुनसक्ने समस्याको समाधान, समन्वय लगायतका कार्यका लागि महासंघले उपाध्यक्ष केशव भट्टराईको संयोजकत्वमा समिति गठन गरेको छ भने कोभिड–१९ को दोस्रो लहरको प्रारम्भिक स्वरूपलाई विश्लेषण गर्दै समग्र विषयको अनुगमन तथा समन्वय गर्न उपाध्यक्ष सुशीला संग्रौलाको संयोजकत्वमा अर्को समिति निर्माण गरेको हो ।
शुक्रबारको बैठकले कोरोनाबाट संक्रमित महासंघका सदस्यहरु राजु अधिकारी, पुष्प बराल , नरेन्द्र ढकाल र बीरु दर्नालको शीघ्र स्वास्थ्य लाभको कामना गरेको छ ।
त्यस्तै महामारी नियन्त्रणका लागि सचेतना जगाउने सन्देशमूलक सूचना सबै सञ्चारमाध्यमलाई उपलब्ध गराउन महासंघ झापाले स्थानीय सरकार, प्रदेश सरकार र संघीय सरकारसमक्ष माग गर्ने निर्णय गरेको छ ।
स्वास्थ्य सुरक्षालाई पहिलो प्राथमिकतामा राखेर स्वास्थ्य सुरक्षाका उपाय र मापदण्डहरु अवलम्बन गर्र्दै पेशागत कर्तव्य पूरा गर्न महासंघले आम सञ्चारकर्मीलाई आग्रह गरेको छ । त्यस्तै सकभर घरबाटै काम गर्ने वातावरण मिलाउन, पर्याप्त स्वास्थ्य सामग्रीको व्यवस्थापन गर्र्न र प्रविधिको उच्चतम प्रयोग गरेर सुरक्षित वातावरण निर्माण गर्न महासंघले सञ्चार प्रतिष्ठानहरुलाई आग्रह गरेको छ ।
महासंघ झापा शाखाको वेबसाइट तत्काल सञ्चालनमा ल्याउन आवश्यक सम्पूर्ण कार्यको लागि सचिव डिकेश लामाको संयोजकत्वमा समिति गठन गरेको छ ।
Related