दमक/ कोरोना संक्रमणबाट आज दमकमा थप दुई जनाको ज्यान गएसँगै मृत्यु हुनेको संख्या ४ पुगेको छ । दमक १ र २ का एक÷एक जना पुरुषको कोरोना संक्रमणका कारण ज्यान गएको नगरपालिकाका स्वास्थ्य निरिक्षक बद्री बरालले जानकारी दिएका छन् ।

दमकमा मंगलबार मात्रै वडा नं. ५ की एक बृद्धाको मृत्यु भएको थियो । दमकमा कोरोनाको दोश्रो लहर चलिरहँदा संक्रमणका कारण ज्यान गुमाउनेको संख्या चार पुगेको हो । यस अघि एक पुरुषको मृत्यु भएको थियो । दमकमा गएको चैत्र अन्तिम सातादेखि कोरोनाको दोश्रो लहर शुरु भएको हो ।

नेपालमा कोरोना भाइरसको संक्रमणबाट मृत्यु हुनेको संख्यामा दिनदिनै नयाँ रेकर्ड बनिरहेको छ । पछिल्लो २४ घन्टामा नेपालमा ५८ जनाको संक्रमितको मृत्यु भएको स्वास्थ्य तथा जनसंख्या मन्त्रालयका प्रवक्ता डाक्टर जागेश्वर गौतमले जानकारी दिए ।

दैनिक संक्रमणबाट मृत्यु हुनेको संख्या अहिलेसम्मकै सर्वाधिक हो । योसँगै नेपालमा हालसम्म कोरोना संक्रमणबाट मृत्यु हुनेको संख्या ३ हजार ४७५ पुगेको छ । कोरोना संक्रमणबाट मंगलबार ५५ जनाको मृत्यु भएको थियो भने सोमबार ३७ जनाको मृत्यु भएको हो ।

पछिल्लो २४ घन्टामा कोरोना संक्रमणको पनि अहिलेसम्मकै सर्वाधिक संक्रमित थपिएका हुन् । २१ हजार ३ सय ७२ जनामा कोरोना परीक्षण गर्दा ८ हजार ६ सय ५९ जनामा संक्रमण पुष्टि भएको हो । गौतमका अनुसार पिसिआरबाट ८६०५ र एन्टिजेन विधिबाट ५४ जनामा संक्रमण पुष्टि भएको हो । योसँगै देशभर सक्रिय संक्रमितको संख्या ६६ हजार ३५२ पुगेको तथ्याङ्क रहेको स्वास्थ्य मन्त्रालयले जनाएको छ ।

दमक नगरपालिकाले कोभिडको शंका भएमा बेलडाँगी स्थित कोभिड अस्पतालमा सम्पर्क गर्न सर्वसाधरणलाई अनुरोध गरेको छ ।