बिराटनगर। कोरोना संक्रमितको उपचारमा अग्रपंक्तिमा खटिने स्वास्थ्यकर्मीको मृत्यु भएमा २५ लाख रुपैयाँ राहत रकम दिने भएको छ ।

प्रदेश सरकार मार्फत कोरोना संक्रमितको पहिचान, उपचार, बिरामीको ओसारपसार र शव व्यवस्थापनमा प्रत्यक्ष रूपमा खटिएका चिकित्सक, स्वास्थ्यकर्मी, चालक, सफाइकर्मी र कर्मचारीको कोरोना संक्रमणका कारण मृत्यु भएमा परिवारलाई क्षतिपूर्तिस्वरूप नेपाल सरकारले प्रदान गर्ने क्षतिपूर्ति रकमसँग दोहोरो नहुने एकमुष्ट २५ लाख रुपैयाँ दिने निर्णय गरेको हो ।

बुधबार बसेको प्रदेश मन्त्रीपरिषद बैठकले प्रदेश सरकारले खटाएका फ्रन्टलाइनरको मृत्यु भएमा सो रकम दिने निर्णय गरेको हो ।
त्यसैगरी फ्रन्टलाइनर स्वास्थ्य कर्मी लगायतलाई ५० प्रतिशत जोखिम भत्ता दिने निर्णय पनि गरेको छ । बैठकले शुरु तलबको ५० प्रतिशत जोखिम भत्ता दिने निर्णय गरेको हो । यस अघिनै संघीय सरकारले पनि ५० प्रतशित भत्ता दिने निर्णय गरेको थियो ।

यस्तैगरी बैठकले फ्रन्टलाइनरलाई संक्रमण पुष्टि भए उपचार खर्च समेत व्योहोर्ने निर्णय गरेको छ । कोभिड–१९ उपचार केन्द्र, विराटनगरमा कार्यरत चिकित्सक र स्वास्थ्यकर्मीका लागि होम क्वारेन्टिनमा बस्न सक्ने अवस्था नभए प्रदेश सरकारले प्रबन्ध गरेको खाना तथा खाजासहितको क्वारेन्टिनमा राख्ने पनि निर्णय गरेको छ ।

सामाजिक विकास मन्त्री उषाकला राईले क्षतिपूर्ति, उपचार, जोखिम भत्ता तथा क्वारेन्टिन बापतको खर्च प्रदेश सरकार, सामाजिक विकास मन्त्रालयको लागि विनियोजित बजेटबाट भुक्तानी गर्ने पनि निर्णय भएको बताइन् ।