दमक, २४ वैशाख । जनता समाजवादी पार्टी (जसपा) नेपाल प्रदेश नं १ ले कोरोना संक्रमणबाट पीडित नागरिकहरुको स्वास्थ्य उपचार र जीवन रक्षामा तीनै तहको सरकार असफल भएको भएको आरोप लगाएको छ । जसपा १ नं. प्रदेशले प्रभावकारी ढंगले संक्रमितकाे उपचार नभएकाेमा सरकार जिम्मेवार हुनु पर्ने बताएकाे छ ।

कोरोना महामारीको संवेदनशील अवस्थामा पनि नागरिकको जीवन रक्षामा उदासिन र गैरजिम्मेवार भएको भन्दै केपी शर्मा ओली नेतृत्वको सरकार यतिबेला कोरोना विरुद्धको खोप निर्यातमा समेत भ्रष्टाचार र कमिसनको खेलमा फसेको आरोप लगाएको छ । प्रदेश अध्यक्ष प्रविण चाम्लिङद्वारा जारी विज्ञप्तिमा सत्ताको आयु लम्ब्याउने भन्दा बाहेक अन्यत्र सरकारको ध्यान नगएको उल्लेख छ ।

जारी विज्ञप्तिमा भनिएको छ –‘प्रदेश नं १ का सबै नागरिकहरुलाई कोरोना खोप उपलब्ध गराउन, सबै नागरिकको निःशुल्क पिसिआर परीक्षण गर्न प्रदेश सरकार र स्थानीय तहहरुलाई आग्रह गर्दछौं ।

विज्ञप्ति मार्फत आवश्यक संख्यामा अस्पतालहरुमा सय्या वृद्धि गर्न, सीमा नाकाबाट भित्रिनेहरुका लागि सुरक्षित क्वारेन्टिनस्थल निर्माण र सञ्चालन गर्न, स्थानीयस्तरमा अक्सिजन सुविधा सहितको कोभिड अस्पताल र आइसोलेसन केन्द्र निर्माण गर्न र कोरोना संक्रमित सबै नागरिकहरुको निःशुल्क र प्रभावकारी उपचार गर्न संघीय सरकार, प्रदेश सरकार र स्थानीय तहहरुलाई आग्रह गरिएको छ ।

जसपा प्रदेश १ ले श्रमजिवी वर्गको निम्ति तत्काल विशेष राहत प्याकेज घोषणा गरी रोगबाट सुरक्षित राख्ने र भोकबाट मर्न नदिने राज्यको कर्तव्य र दायित्व पूरा गर्न सरकारसँग माग गरेको छ । साथै कालाबजारी र कृर्तिम अभाव सिर्जना हुन नदिन प्रभावकारी अनुगमन र संलग्नलाई कडा कारबाही गर्न समेत माग गरेको छ ।

सर्वसाधारणलाई अनिवार्य मास्क लगाउन, साबुन पानीले हात धुने, सेनिटाइजरको नियमित प्रयोग लगायत स्वास्थ्य सुरक्षाका सम्पूर्ण मापदण्ड पूरा गरी सुरक्षित रहन र अत्यावश्यक काम नपरेसम्म घर बाहिर ननिस्कन, भीडभाड नगर्न आह्वान गर्दै जसपा प्रदेश १ ले मातहतको पार्टी समितिहरुलाई नागरिकको स्वास्थ्य सुरक्षाका लागि आवश्यक सहयोग र समन्वयमा जुट्न आह्वान समेत गरेको छ ।