काठमाडौं । प्रधानमन्त्री केपी शर्मा ओलीले आशा गरेका जनता समाजवादी पार्टी (जसपा)बाट विश्वासको नपाउने पक्का भएको छ । आज जसपाका अध्यक्ष महन्थ ठाकुर र राजेन्द्र महतोले प्रधानमन्त्री केपी शर्मा ओलीलाई भेटेर विश्वासको मत नदिने बताएका छन् ।

जसपा नेता ठाकुर र महतोले अहिलेसम्म हाम्रो माग पुरा भएका छैनन् हामी तपाईलाई विश्वासको मत दिन सक्दैनौं भनेका छन् । जवाफमा प्रधानमन्त्री ओलीले अदालतबाट अनुमति लिनुपर्ने भएकाले समय लागेको बताएका थिए ।

प्रधानमन्त्री ओलीले विश्वासको मत लिने प्रयोजनका लागि भोलि सोमबार विशेष अधिवेशन बोलाएका छन् । प्रधानमन्त्री ओलीको दल एमालेका १२१ सांसद छन् । विश्वासको मत पाउन १३६ मत चाहिन्छ ।

प्रमुख विपक्षी दल नेपाली कांग्रेसको ६१ सांसद जना, नेकपा माओवादी केन्द्रसँग ४९ र जसपासँग ३२ संसद छन् । नेकपा माओवादीले सरकारको समर्थन फिर्ता लिएकाले प्रधानमन्त्रीलाई मतदिने अवस्था छैन ।

जसपाको बाबुराम–उपेन्द्र पक्षले यसअघि नै ओलीको विपक्षमा उभिने बताइसकेका छन् । यस्तैगरी महन्थ ठाकुर–राजेन्द्र महतो पक्षले पनि हालको अवस्थामा मत नदिने बताएपछि प्रधानमन्त्री ओलीले विश्वासको मत नपाउने पक्का भएको हो ।