काठमाडौं । जसपा अध्यक्ष महन्थ ठाकुरले नयाँ सरकार गठन प्रक्रियामा सहभागी नहुने घोषणा गरेका छन् । सोमबार संसदमा आफ्नो कुरा राख्दै प्रधानमन्त्री केपी शर्मा ओलीको पक्षमा खुलेका ठाकुरले विश्वासको मत लिने बेला उनी पक्षका सांसद तटस्थ बसेका थिए ।
संसदमा उनले आन्दोलनको क्रममा लागेकाहरुको मुद्दा फिर्ता, बन्दी रिहाइ, नागरिकता, संविधान संशोधन लगायतका सवालमा प्रधानमन्त्री ओलीसँग वार्ता सकारात्मक रुपले अगाडि बढिरहेको भन्दै उनले नयाँ सरकार गठनमा सहभागी नहुने सोमबार राती एक विज्ञप्ति मार्फत भनेका छन् ।
‘वर्तमान राजनीतिक परिस्थितिमा सत्ता प्राप्तिभन्दा एजेण्डा सम्बोधन नै जसपा नेपालको मूल ध्येय रहेको अवस्थामा मुद्दाबाट विचलित भई नयाँ सरकार गठन गर्ने, नयाँ सरकारमा सहभागी वा वैकल्पिक सरकार गठनमा संलग्न हुने कार्य जसपा नेपालको उद्देश्य विपरीत हो’, ठाकुरले भनेका छन् ।
जसपाकै अर्का अध्यक्ष उपेन्द्र यादव र डा. बाबुराम भट्टराई भने ओली नेतृत्वको वर्तमान सरकारलाई विदा गरेर नयाँ सरकार गठन सरिक हुने बताइसकेका छन् । सोमबार उनीहरु पक्षका सांसदहरुले प्रधानमन्त्री ओलीको विश्वासको मतको विपक्षमा मत दिएका थिए ।
यादव र भट्टराई पक्षले सोमबार नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष प्रचण्डसँग संयुक्त विज्ञप्ति जारी गर्दै राष्ट्रपति विद्यादेवी भण्डारीलाई संयुक्तरुपमा पत्र लेखेर संविधानको धारा ७६ को उपधारा २ अनुसार नयाँ सरकार गठनको प्रक्रिया अघि बढाउन आग्रह गरेका थिए । राष्ट्रपति भण्डारीले पनि बहुमतको सरकार गठनका लागि वैशाख ३० गतेसम्मको समयसीमा दिएकी छन् ।
Related