• बालकुमार ताम्ली (सजन)

धरान/सुनसरीको धरानमा जेष्ठ १ देखि देखि १५ गते राति १२ बजे सम्म पूर्ण लकडाउन गरिएको छ । दिनप्रति दिन कोरोना संक्रमितको संख्या बढ्दै गएपछि पूर्ण लकडाउन गरिएको हो ।

लकडाउनलाई प्रभावकारी बनाउने शनिबार देखि बाक्लो प्रहरी परिचालन साथै स्थानीय सरकारले विहान देखिनै माइकिङ् गरेको छ । शनिबार मर्निङ वर्क जानेहरुलाई पनि होल्ड गरिएको प्रहरीले जनाएको छ । मर्निङ वर्क गदैं विजयपुर पुगेका केही स्थानीयलाई प्रहरीले चोकमा रोकेको थियो । धरानमा यातायात, कलकारखाना, संघसंस्था, विद्ययालय साथै बजार सबै पुर्णरूपमा बन्द भएको छ ।

धरान उपमहानगरपालिकामा इलाका प्रहरी कार्यालय धरानले बढी प्रहरी जनशक्ति परिचालन गरिएको इलाका प्रहरी कार्यालय धरानका प्रमुख डिएसपी ज्ञानेन्द्रबहादुर बस्नेतले बताए । उहाँले घरमै बसेर कोरोना महामारी फैलनबाट बच्न आग्रह गरेका छन् ।

१५ दिन धरानमा लकडाउनलाई कडाइका साथ लागु गरेर कोरोना संक्रमणदरलाई कम गराउने स्थानीय सरकारको योजना अनुसार थप कडाई गरिएको हो । शनिबार धरान उपमहानगरपालिकामा मेयर तिलक राईको अध्यक्षतामा बसेको बैठकले पनि लकडाउनलाई कडाई गर्ने निर्णय गरेको थियो । सुनसरीका प्रमुख जिल्ला अधिकारी उमेश ढकालले लकडाउन उल्लंघन गर्नेलाई संक्रमक रोग नियन्त्रण ऐन अनुसार कारबाही गर्न प्रहरीलाई निर्देशन दिएका छन् ।