विर्तामोड। झापामा शुरुगरेको “एकका लागि एक अभियान” अन्तर्गत ‘एक व्यक्ति एक सिलिन्डर’ सहयोग अभियानमा सोमबार बिर्तामोड उद्योग बाणिज्य संघसहित १४ संघसंस्था तथा व्यक्तिले ४० थान अक्सिजन सिलिन्डर सहयोग गरेका छन् ।
एकका लागि एक अभियानले शुरु गरको ‘एक व्यक्ति एक सिलिण्डर’ संकलन कार्यमा बिर्तामोड उद्योग बाणिज्य संघको सहजीकरणमा बिर्तामोडका सामाजिक संघ संस्था र व्यक्तिहरुले प्रतिसिलिन्डर १५ हजार रुपैयाँ सहयोग गरेका थिए ।
उद्योग बाणिज्य संघका अध्यक्ष प्रकाश शिवाकोटीको अध्यक्षता र एकका लागि एक अभियानका सहसंयोजक बिनोद बस्नेतको प्रमुख आतिथ्यमा आयोजित सिलिन्डर वापतको रकम हस्तान्तरण कार्यक्रममा हङकङ बस्ने बिर्तामोडका नागरिकबाट १० थान, बिर्तामोड उद्योग बाणिज्य संघबाट ५ थान, लायन्स क्लव अफ अनारमनीबाट ५ थान, छठ सेवा समिति बिर्तामोडबाट ५ थान, बुद्धि घिमिरेबाट ४ थान, त्यसैगरी सौर्यबत्ती जडान उपभोक्ता समितिबाट ३ थान, स्वर्गीय पर्शु सिटौलाको स्मृतिमा छोरा शैलेन्द्र सिटौलाबाट ३ थान, लोकप्रसाद चापागाईंबाट १ थान, प्रल्हाद शिवाकोटीबाट १ थान, विनय डाँगीबाट १ थान, क्रिएटिभ इन्टरनेशनल (एजाज अहमद अन्सारी) बाट १ थान गरी ४० थान सिलिन्डर प्रदान गरिएको बिर्तामोड उद्योग बाणिज्य संघका महासचिव अर्जुन मैनालीले जानकारी दिए ।
व्यक्तिगत रुपमा एक सय ३० बढी सिलिन्डरको रकम अभियानको खातामा जम्मा भइसकेको छ । योसँगै एक सय ७० बढी सिलिन्डरको रकम जम्मा भइसकेको बताइएको छ । १५ हजारका दरले २५ लाख रुपैयाँभन्दा बढी हुन आउँछ । सहयोग जुट्ने क्रम जारी छ । सहारा नेपाल साकोस र अन्तर्राष्ट्रिय झापाली समाजले यसअघि नै एक÷एक सय वटा सिलिन्डर प्रदान गर्ने प्रतिबद्धता जनाइसकेका छन् । उत्साहजनक सहयोग अभियानले लक्ष्यको नजिक पुगिएको अभियानका संयोजक महेन्द्रकुमार गिरीले बताएका छन् ।
Related