काठमाडौं। मध्यरातमा मन्त्रिपरिषद्को सिफारिशमा राष्ट्रपति विद्यादेवी भण्डारीले प्रतिनिधिसभा विघटन गरेर मध्यावधि चुनाव घोषणा गरेकी छन् । राष्ट्रपतिले प्रतिनिधिसभाको नयाँ निर्वाचन गर्न कात्तिक २६ र मंसिर ३ गते मिति तोकेकी हुन् ।

शुक्रबार मध्यरातमा बसेको मन्त्रिपरिषद् बैठकले संविधानको धारा ७६(७) अनुसार प्रतिनिधिसभा भंग गरी मध्यावधि घोषणा गर्न राष्ट्रपतिसमक्ष सिफारिश गरे लगतै राष्ट्रपतिले प्रतिनिधिसभा भङ्ग गरी मध्यावधि चुनाव घोषणा गरेकी हुन् ।

संविधानको ७६(५) बमोजिम प्रधानमन्त्री नियुक्त हुन नसकेको पछि धारा ७६(७) अनुसार प्रधानमन्त्रीको सिफारिशमा राष्ट्रपतिले प्रतिनिधिसभा विघटन गरी ६ महीनाभित्र अर्को प्रतिनिधिसभाको निर्वाचन सम्पन्न गर्ने व्यवस्था अनुसार राष्ट्रपतिको कार्यालयले विज्ञप्ति जारी गरी निर्वाचनको मिति तोकेको हो ।

संसद भंग गर्नुअघि राष्ट्रपति भण्डारीले प्रधानमन्त्री नियुक्तिका लागि संविधानको धारा ७६(५) अनुसार आव्हान सरकार गठन गर्न दिएको समय सिमामा प्रधानमन्त्री ओली र नेपाली कांग्रेसका सभापति शेरबहादुर देउवाले गरेको दाबी अस्वीकार गरेकी थिइन् । प्रधानमन्त्री दावेवार दुवैको समर्थनकर्ता भनिएका सांसदहरु एकअर्कामा दोहोरो परेको, दलको निर्णय विपरीत एकले अर्कालाई समर्थन गरेको र सम्बन्धित दलले मान्यता नदिन लेखेर आएको भन्दै राष्ट्रपतिले दुवैको दाबी नपुग्ने निर्णय गरेकी थिइन् ।