काठाडौं। नेपाल पत्रकार महासंघले प्रतिनिधिसभा विघटन जस्तो असंवैधानिक कदमका विपक्षमा उभिन पत्रकारहरुलाई अपिल गरेको छ ।

महासंघले वैकल्पिक सरकार बन्न सक्ने अवस्था हुँदाहुँदै पनि मध्यरातमा प्रतिनिधिसभा विघटन गरेर निर्वाचन घोषणा गर्ने कदमले संघीय लोकतान्त्रिक गणतन्त्रलाई संकटमा पार्ने काम भएको हुँदा त्यसको रक्षाका लागि सहकार्य गर्न पत्रकारहरुलाई अपिल गरेको हो ।

संविधानमा भएको निर्मम प्रहार रोक्नका लागि प्रेस तथा अभिव्यक्ति स्वतन्त्रता र आम नागरिक पक्षधरहरुले वर्तमान सरकार प्रमुख केपी शर्मा ओली र राष्ट्रपतिको असंवैधानिक कदमका विपक्षमा दृढताकासाथ एक ठाउँमा उभिन र लोकतान्त्रिक मूल्य मान्यताको रक्षाका लागि एकजुट भएर लाग्न संचारकर्मीलाई आग्रह गरेको छ ।

महासंघले जनतालाई यतिवेला संविधान प्रतिकूल चुनाव नभएर कोरोना महामारीबाट बच्न उपचार, अस्पतालमा बेड र अक्सिजन चाहिएको अवस्थामा मध्यरातमा मध्यावधि चुनावको सिफारिस गरिनु जालझेलपूर्ण कदम भएको जनाएको छ ।

कोरोना महामारीको गम्भीर अवस्थामा जनताको उपचारमा ध्यान नदिएर राष्ट्रपतिले बैकल्पिक सरकार बन्ने आधार हुँदाहुँदै मध्यरातमा चुनावको सिफारिस गर्नु भनेको नेपालको परिवर्तनकारी आन्दोलनले प्राप्त गरेको संघीय लोकतान्त्रिक गणतन्त्रसहितका व्यवस्था विरुद्धको प्रहार भएको महासंघले जारी गरेको विज्ञप्तिमा उल्लेख गरेको छ ।