काठमाडौं। हङकङकी पर्वतारोही साङ यी हङले सर्वोच्च शिखर सगरमाथामा सबैभन्दा छिटो आरोहण गर्ने महिला आरोहीको कीर्तिमान राखेकी छिन् । शनिबार दिउँसो १ बजेर २० मिनेटमा सगरमाथाको आधार शिविरबाट उकालो लागेकी उनले आज (आइतबार) दिउँसो ३ बजेर १० मिनेटमा चुचुरोमा पाइला टेकेकी थिइन् ।

उनी २५ घण्टा ५० मिनेटमा चुचुरोमा पुगेको सम्कर्प अधिकृत ज्ञानेन्द्र श्रेष्ठले बताएका छन । यसअघि नेपालकी आरोही फुन्जो झ्याङ्मु लामाको नाममा छिटो आरोहणको कीर्तिमान रहेको थियो । उनले १५ मे २०१८ मा ३९ घण्टा ६ मिनेटमा सगरमाथा चढेर छिटो चढ्ने कीर्तिमान राखेकी थिइन् ।

पुरुषतर्फको कीर्तिमान भने पेम्बा दोर्जे शेर्पाको नाममा रहेको छ । उनले सन् २००४ मा राखेको ८ घण्टा १० मिनेटको रेकर्ड त्यसयता कसैले पनि तोड्न सकेको छैन ।
तस्वीरः एसिया टाइम्सबाट साभार