काठमाडौं । जल तथा मौसम विभागले बंगालको खाडीमा रहेको न्यूनचापीय क्षेत्र आज चक्रवातमा परिणत भई मंगलबारसम्ममा धेरै शक्तिशाली चक्रवात आउने जनाएको छ । यस चक्रवातको असर नेपालको विभिन्न स्थानहरुमा असर पर्ने सम्भावना रहेको विभागको भनाइ रहेकोछ ।

विभागले आज (सोमबार) जारी गरेको बुलेटिनमा आवश्यक सतर्कता अपनाउन सबैमा अनुरोध गरेकोे छ । यस्तै उच्च हिमाली भूभागमा हावाहुरी आउन सक्ने सम्भावना रहेको हुँदा मंगलबारदेखि केहि दिनसम्मका लागि पर्वतारोहीहरूलाई हिमाल आरोहण गर्न विभागले अनुरोध गरेको छ । सो समयमा सतर्कता अपनाई सुरक्षित स्थानमा रहन पनि अनुरोध गरेको छ ।

न्यूनचापीयका कारण मंगलबार अपरान्हपछि देशका धेरै स्थानहरूमा सामान्यदेखि पूर्ण बदलीे भई बागमती र प्रदेश १ का उच्च हिमाली–पहाडी भूभागका केही स्थानहरुमा हल्कादेखि मध्यम हिमपात–वर्षा को सम्भावना रहेको छ । हिमाली भूभागमा हावाहुरी समेत हुनसक्ने सम्भावना रहेको छ । विभागको बुलेटिनमा भनिएको छ ।

बुधबारदेखि देशका १, २ नम्बर प्रदेश, बाग्मती, गण्डकी र लुम्बिनी प्रदेशका थोरै स्थानहरुमा मध्यम र भारी बर्षाको सम्भावना रहेको छ भने बिहीबारदेखि कर्णाली र सुदुर पश्चिमका केही स्थानमा समेत भारी बर्षाको सम्भावना रहेको विभागले जनाएको छ ।

साथै विभागले यस बर्ष मेघगर्जन, चट्याङ र हावाहुरीसहित असिना पानीको समेत सम्भावना बढी रहेकोले आवश्यक सतर्कता अपनाउन भनेको छ ।