लिम्बुवानखबर, ११ जेठ । सर्वोच्च अदालतले प्रधानन्यायाधीश चोलेन्द्रशम्शेर जबरा र प्रधानमन्त्री केपी शर्मा ओली बिच भेट नभएको स्पष्टीकरण दिएको छ ।

आज (मंगलबार) सर्वोच्चका सहप्रवक्ता देवेन्द्र ढकालले विज्ञप्ति जारी गर्दै प्रधानन्यायाधीश र प्रधानमन्त्रीबीच भेट भएको भनी सञ्चार माध्यममा आएको समाचारमा सत्यता नरहेको स्पष्ट पारेका हुन् ।

विज्ञप्तिमा स्वतन्त्र, निष्पक्ष, सुदृढ र सक्षम न्यायपालिका एवं विधिको शासनको सुनिश्चितता तथा न्यायपालिकाप्रतिको जनआस्था अभिवृद्धिमा सर्वोच्च अदालत सदैव गम्भीर, सचेत र संवेदनशील एवं पूर्ण प्रतिवद्ध रहेको उल्लेख गरिएको छ ।

सोमबार प्रधानमन्त्री ओली र प्रधानन्यायाधीश जबराबीच बालुवाटारमा भेट भएको समाचार सार्वजनिक भएकोमा सर्वोच्चले त्यो सरासर असत्य भन्दै यसले न्यायपालिकाको स्वच्छता, आस्था र विश्वासमा प्रतिकुल प्रभाव पार्ने बताएको छ ।