दमक/ झापाको दमकमा निजी क्षेत्रले कोरोना संक्रमितको उपचारमा सहयोग पुरयाउन उद्देश्यले महामारी नियन्त्रण महाअभियान दमक सञ्चालन गर्ने भएको छ ।

दमक उद्योग वाणिज्य संघले संघका पूर्व अध्यक्ष एवं नेपाल उद्योग वाणिज्य महासंघका पूर्व केन्द्रिय सदस्य समेत रहेका प्रकाश प्रसाइँको संयोजकत्वमा सो महाअभियान समिति गठन गरेको हो ।

अभियानले पहिलो चरणमा दमकस्थित सरकारी तथा सामुदायिक अस्पतालमा उच्च प्राथमिकता साथ भेन्टिलेटर सञ्चालनमा ल्याउन प्रयास गरिने बताइएको छ । प्रसाइँको नेतृत्वमा गठन गरेको समितिको सदस्य सचिवमा संघका वरिष्ठ उपाध्यक्ष गोपाल गुरागाइँलाई जिम्मेवारी दिइएको छ ।

२१ सदस्यीय सो समितिले यथाशक्य छिटो निजी क्षेत्र (उद्योगी, व्यवसायी) तथा सामाजिक संघ संस्थाहरुसँगको सहयोगमा कम्तीमा एउटा भेन्टिलेटरसहित विभिन्न स्वास्थ्य सुरक्षाका सामग्री अस्पताललाई सहयोग गर्ने सदस्य सचिव गुरागाइँले जानकारी दिए । हामी निजी क्षेत्रले पनि यो महामारी नियन्त्रण गर्दै बिरामीको उपचारमा सहयोग पुरयाउन योगदान गरौं भन्ने उद्धेश्यले यो कामको शुरुवात गरेका हौं– सचिव गुरागाइँले भने ।

यस महाअभियानकोलागि हाल दमक उद्योग वाणिज्य संघको कोषबाट एक लाख ५१ हजार रुपैयाँ जम्मा गरिएको छ । त्यस्तै अन्य उद्योगी व्यवसायी नेताहरुले समेत २५ हजारदेखि ५१ हजार रुपैयाँसम्म नगद सहयोग दिने क्रम शुरु भएको छ । महाअभियान समितिले यो महामारीको संकटमा देश विदेशमा रहने नेपालीलाई आ–आफ्नो स्थानबाट सकेको सहयोगका लागि पनि अपिल गरेको छ ।