काठमाडौं । टीकापुर घटनामा जन्मकैदको सजाय भोगिरहेका रेशम चौधरी सोमबार छुटेका छन् । गणतन्त्र दिवसको अवसरमा राष्ट्रपति रामचन्द्र पौडेलबाट आममाफी पाएपछि चौधरी कारागारबाट रिहा भएका हुन् ।

मन्त्रिपरिषद्ले आइतबार बिहान रेशमको करिब १५ वर्ष कैद सजाय माफी गर्न सिफारिस गरेको थियो । पाँच वर्ष तीन महिना जेल सजाय काटेका चौधरीको १४ वर्ष ९ महिना जेल सजाय छुट भएको हो ।

यसपटक चौधरी सहित १९ जनाले संविधानको धारा २७६ र मुलुकी फौजदारी कार्यविधि संहिताको दफा १५९ बमोजिम गणतन्त्र दिवसको उपलक्ष्यमा माफी पाएका छन् । रेशम चौधरी डिल्लीबजार कारगारबाट छुटेलगत्तै पुल्चोक हरिहर भवनस्थित मन्त्री क्वाटरमा पत्नी तथा मन्त्री रञ्जिता श्रेष्ठसँगै पुगेका थिए ।

नागरिक उन्मुक्ति पार्टीका संरक्षक रहेका चौधरी त्यस लगतै माइतीघर मण्डला पुगेर नेता तथा कार्यकर्ताहरुलाई सम्बोधन गरेर नेपालगञ्ज पुगेका थिए । चौधरीले आफ्नो पैत्रिक घर कैलाली पुगेर पार्टीका नेता कार्यकर्ता लगायतलाई सोमबार नै भेटघाट गरेका छन् । आज धनगढी काराकारमा कैद सजाय कटिरहेका राजबन्दीहरुसँग भेट्ने कार्यक्रम रहेको समेत बरिष्ठ उपाध्यक्ष दामोदर पण्डितले बताएका छन् । असाेज ३ गते सबै राजबन्दीहरूलाइ छुटाउने नाउपाले जनाएकाे छ ।

पार्टी संरक्षक जेलमुक्त भएकाे खुशीयालीमा नाउपाका नेता कार्यकर्ताहरूले विभिन्न स्थानमा साँझ राँकेजुलुस गरेका छन् ।