ललितपुर, २९ वैशाख । किरात राई समुदायले आज सांस्कृतिक पर्व उभौली मनाएका छन् । अन्न उब्जनी हुने प्रकृति भूमिको पूजाआजा गरी किरात समुदायले उभौली पर्व मनाएका हुन् ।

पूर्व प्रदेश १ को सबै जिल्लामा बसोबास गर्ने किरात राईहरुले त्यहाँमात्र होइन थातथालो छोडेर काठमाडौं उपत्यका स्थित काठमाडौं, ललितपुर र भक्तपुर त्यसैगरी नेपालका अन्य जिल्लाहरुमा पनि मनाएका छन् भने देशविदेशमा रहेकाहरुले पनि यो बर्ष राम्रो बालीनाली सप्रियोस भन्दै प्रकृतिको पूजा गर्दै पर्व मनाएका हुन् ।

किरात राईले उभौली त्यसैगरी याक्थुङ लिम्बूले यक्वा तङ्नाम, सुनुवारले स्यादर र याख्खाले युक्चाङ भनेर यो पर्वलाई मान्ने गर्दछन् । यस क्रममा आफ्नो जातीय पहिचान झल्किने पोसाकमा ढोलक, ढोल, झ्याम्टा लगायतका आ–आफ्ना सांस्कृतिक वाजागाजाको तालमा साकेला, केलाङ् लगायत मौलिक नाच्नहरु नाच्ने चलन छ ।

उभौलीको समयपछि गर्मी बढ्दै जाने भएकाले किरात समुदायमा चराचुरुङ्गीदेखि जीवजन्तु समेत माथिल्लो भेग उत्तरतर्फ चिसो स्थानमा लाग्ने विश्वास छ । यो पर्वमा आपसी सद्भाभावका साथ खुशी साटासाट गर्दै सांस्कृतिक परिकारहरु समेत बनाएर खाने चलन छ ।