ललितपुर, ३ जेठ । किरात राई समुदायले काठमाडौंस्थित टुडिखेलमा उभौलीको अवसरमा साकेला मनाएका छन् । शनिबार उपत्यकामा बसोबास गर्ने विभिन्न थरका राई समुदायले आफ्नो सांस्कृतिक परम्परा अनुसार टुडिखेलमा साकेला मनाएका हुन् ।

किरात समुदायले वैशाख शुक्ल (चण्डि) पूर्णिमाको दिन उभौली पर्व र मंसिर शुक्ल धन्याचल पूर्णिमाको दिन उधौली पर्व मनाउने गर्दछन् । वैशाख २९ गते बैशाख शुक्ल पूर्णिमाको दिन उभौली पर्व मनाइएपनि शनिबार मात्र टुँडिखेलमा साकेला उभौली उत्सवको आयोजना गरिएको हो ।

किरात राई यायोक्खाको काठमाडाैं समितिले बिगत २३ बर्ष अगाडि देखि निरन्तररुपमा टुडिखेलमा यो पर्व मनाउँदै आईरहेको जनाएका छन् ।
किरात राई समुदायको मौलिक बाजा ढोल र झ्याम्टाका साथ प्रकृतिमा रहेका विभिन्न चरा–चुरुंगीहरुको नक्कलका साथ नृत्य गर्दै आपसमा खुसीयाली साट्दै मनाउने परम्परा रहेको छ ।

किरात राई, लिम्बु, सुनुवार तथा याक्खा समुदायले आ–आफ्नो परम्परा अनुसार प्रत्येक बर्ष यो पर्व मनाउँदै आईरहेका छन् ।

वैशाखे पूर्णिमामा अन्नबाली लगाउने सिजन सुरु हुने भएकाले बालीनाली सप्रियोस् र बर्षभारी खाने अन्न फलोस् भन्दै प्रकृतिको पूजा गरी यो पर्व मनाइन्छ । यसरी प्रकृतिको पूजा गरे बाली सप्रने किरात समुदायको धार्मिक विश्वास रही आएको छ ।