ललितपुर, १७ जेठ ।  गएराती परेकाे वर्षाका कारण धनकुटाका दुई स्थानमा सडक अवरुद्ध भएकाे छ ।  वर्षासँगै आएको बाढी र पहिरोका कारण धनकुटाको साँगुरीगढी गाउँपालिका–६ मा पर्ने कोशी लोकमार्गका दुई स्थानमा सडक पूर्ण रूपमा अवरुद्ध भएको हो ।

आज (शनिवार) बिहान फेदी नजिकैको लेउती खोलामा अचानक आएको बाढीले करिब एकसय मिटर सडक कटान गरेपछि दुवैतर्फको सवारी आवागमन पूर्ण रूपमा ठप्प भएको जिल्ला प्रहरी कार्यालय धनकुटाकाले जनाएकाे छ ।

घटना स्थलमा प्रहरी चौकी मूलघाटबाट खटिएको टोलीले स्थानीय तह र सम्बन्धित निकायसँग समन्वय गरी सडक खुलाउने प्रयास गरिरहेको जनाएको छ।

त्यसैगरी, आज बिहान ४ः४५ बजेतिर नमस्ते झरनाको छेउमा रुख लड्नुका साथै माथिबाट खसेको पहिरोले पनि सोही लोकमार्गको अर्को खण्ड पूर्ण रूपमा अवरुद्ध भएको छ।

दुवै स्थानमा अवराेध सडक निर्माण कार्य तीव्र गतिमा भइरहेको जिल्ला प्रहरीले जनाएको छ । काेशी लाेक मार्गमा कुद्ने दुवै तर्फ जाने यात्रुहरूलाई वैकल्पिक मार्ग प्रयोग गर्न अनुरोध गरिएको प्रहरीले जनाएको छ।

खासगरी धनकुटाको उक्त सडक अवरुद्ध हुँदा यात्रुहरूलाइ अहसज भएकाे  छ ।

तस्वीरः सन्तरवीर लामा