विराटनगर। मोरङ प्रहरीले हत्या संलग्नका आरोपितलाई पक्राउ गरी सार्वजनिक गरेको छ । केराबारीस्थित जङ्गलमा शिकार खेल्ने क्रममा भएको हत्या घटनामा संलग्न भएको आरोपमा चारजना हतियारसहित पक्राउ परेपछि सार्वजनिक गरिएको हो ।

गत बैशाख ८ गते शिकार खेल्ने क्रममा गाँउपालिकास्थित बाँसघारी खोप सहकारी राष्ट्रिय वनमा ३२ वर्षीय हस्तकुमार राईको गोली लागि मृत्यु भएको थियो ।

मोरङ् प्रहरीको अनुसार घटनामा २६ वर्षीय रुविन लिम्बू, ३७ वर्षीय गजेन्द्रबहादुर राईसहित १० जनाको समूह रहेको प्रहरीले जनाएको छ । रुविन र गजेन्द्रलाई घटना घटेको भोलिपल्ट बैशाख ९ गतेनै प्रहरीले पक्राउ गरेका थिए । फरार रहेकामध्ये ४ जना केराबारी गाँउपालिका ३ का ४४ वर्षीय डिकबहादुर राई, ३६ वर्षीय बुद्धविर लिम्बू, १९ वर्षीय रामप्रसाद राई र लेटाङ नगरपालिका १ का १९ वर्षीय विपन लिम्बूलाई जेठ १९ गते नै पक्राउ गरी जिल्ला प्रहरी कार्यालय मोरङमा राखि अनुसन्धान भईरहेको थियो ।

प्रहरीले उनीहरुको साथबाट शिकार खेल्दा प्रयोग गरिएको चार थान भरुवा बन्दुकसमेत बरामद गरेको छ । बैशाख ८ गते शिकार खेल्दै गर्दा राती करिब ९ बजे गजेन्द्र राईले प्रहार गरेको भरुवा बन्दुकको गोली हस्तलाई लागेको अनुसन्धानका क्रममा खुलेको मोरङ प्रहरीले जनाएको छ ।