२९ जेठ, काठमाडौं । नेपाली कांग्रेसले पार्टीको १४औं महाधिवेशन ९ दिन पर सार्ने प्रस्ताव गरिएको छ । आज बसेको पदाधिकारी बैठकले वडा अधिवेशन भने एक महिना ढिला अर्थात् साउन ६ बाट सुरु गर्ने प्रस्ताव भएको छ ।

शनिबार बसेको कांग्रेस पदाधिकारी र पूर्व पदाधिकारीहरुको बैठकमा सभापति शेरबहादुर देउवाले महाधिवेशन गरिछाड्ने बताएका थिए । तर पूर्वनिर्धारित मिति असार ७ बाट वडा तहको अधिवेशन सुरु गर्न सक्ने अवस्था नभएको भन्दै कार्यतालिका संशोधन गर्न प्रस्ताव गरिएको हो ।

सहमहामन्त्री डा. प्रकाशशरण महतका अनुसार क्रियाशील सदस्यता छानविनको म्याद २० असारसम्म थप गर्ने प्रस्ताव आएको छ । यो अवधिमा बाँकी रहेको क्रियाशील सदस्यता वितरण तथा नवीकरणका साथै छानविन सक्ने प्रस्ताव भएको छ ।

२४ असारभित्र केन्द्रीय कार्यसमितिबाट अनुमोदन गर्ने र साउन ६ बाट वडा तहको अधिवेशन गर्ने प्रस्तावमा उल्लेख छ । यसैगरी १४औं केन्द्रीय महाधिवेशन भदौ १६ देखि १९ गतेसम्ममा सक्ने गरि महामन्त्री शशांक कोइरालाको प्रस्ताव रहेको छ ।

यसअघि महाधिवेशनको मिति भदौ ७ देखि १० गतेसम्ममा सम्पन्न गर्ने निर्णय भएको थियो ।