पाँचथर। पाँचथरको फिदिम स्थित जोरसाल बजार नजिकै एक बृद्धको आइतबार हत्या भएको छ । हत्यामा संलग्नको खोजी तालिम प्राप्त कुकुरको सहयोगमा भईरहेको जिल्ला प्रहरी कार्यालय पाँचथरले जनाएको छ । आइतबार बिहान बर्ष ७८ का टेकबहादुर लिम्बूको आफ्नै निबासमा हत्या भएको हो।
सडकको छेउमा रहेको घरमा अशक्त ८४ बर्षकी श्रीमतीसँग बस्ने लिम्बुको के कारण हत्या गरिएको खुल्न सकेको छैन । उक्त घटना रातीको समयमा नै भएको हुन सक्ने मृतकका आफन्त बुद्धराज लिम्बुले बताए । लिम्बुका अनुसार मृतक भारतीय सेनाका सेवानिबृत हुन् । मृतकका दुई छोरा र तीन छोरी छन् ।
मानवअधिकारकर्मी मंगल बेघा भन्छन्– ‘प्रहरीले चाडो भन्दा चाडो आरोपितलाई पहिचान गरि पिडितलाई न्याय र दोषीमाथि कानूनबमोजिम कारबाहीको माग गर्दछौ ।” पाँचथरमा पटक–पटक यस्तो घटना दोहोरी रहेकोले प्रशासनले एक नयाँ संयन्त्र अपनाउनु पर्नेमा पनि उनले जोड दिए ।
उक्त घटना भएको दिन मृतक लिम्बु र श्रीमती मात्र घरमा भएको पुष्टि भएको छ । घटना के कारणले किन र कसले भन्ने विषयमा विभिन्न कोणबाट अनुसन्धान भइरहेको र केही दिनमै आरोपीलाई कानूनको कठघरामा उभ्याउने जिल्ला प्रहरी कार्यलय पाँचथरका सुचना अधिकारी प्रहरी निरीक्षक डम्बर बिश्वकर्माले बताए ।
Related