लिम्बुवानखबर, ३ असार
पाँचथर । किरात याक्थुङ चुम्लुङ पाँचथर शाखा र साँस्कृतिक पुनर्जागरण अभियानले पाँचथरको फिदिम नगरपालिकाको ऐतिहासिक नाम ‘फेदेन’ लाई कायम गर्न माग गरेको छ ।
सामाजिक दुरी कायम गर्दै अभियन्ताहरुले बिहीबार फिदिम नगरपालिकाका नगर प्रमुख ओनाहाङ नेम्बाङ र प्रमुख प्रशासकीय अधिकृत अम्बिका प्रसाद अधिकारीलाई ज्ञापन–पत्र बुझाएका हुन् । ज्ञापन–पत्रमा फिदिमको वास्तविक नाम ‘फेदेन’ भएकाले ऐतिहासिकता र वास्तविकतालाई आत्मसात गर्दै नगरपालिकाको आर्थिक वर्ष २०७८÷७९ को वार्षिक नीति, कार्यक्रमको नगरसभामा सो निर्णय गर्न माग गरिएको छ ।
साँस्कृतिक पुनर्जागरण अभियानका संयोजक मधुराज केरुङ र कियाचु पाँचथरका अध्यक्ष महेन्द्र आङदेम्बेद्वारा हस्ताक्षरित विज्ञप्तीमा नगरपालिकासँग भाषा, संस्कृति तथा ललितकला सम्बन्धि नीति निर्माण गर्न, स्थानीय तहमा याक्थुङ (लिम्बू) सिरिजंगा लिपिलाई कामकाजी भाषा घोषणा गर्न र सबै तहमा याक्थुङ (लिम्बू) मातृभाषा शिक्षा लागू गर्न शिक्षक दरबन्दीको व्यवस्था गर्न समेत माग गरेको छ ।
भाषिक साँस्कृतिक अधिकार सम्बन्धि राष्ट्रिय–अन्तराष्ट्रिय प्रावधानहरुलाई आधार मान्दै साँस्कृतिक सम्पदाहरुको गरिमा र महत्वलाई आत्मसात गर्दै, नेपालको संविधानको धारा २६ को धार्मिक स्वतन्त्रताको हक, धारा ३२ को भाषा संस्कृतिको हक, धारा ५१ (ग) मा भाषा, लिपि, संस्कृतिको संरक्षण र बिकास सम्बन्धि प्रावधान, अनुसूची ८ को स्थानीय तहको अधिकार सूची र स्थानीय सरकार सञ्चालन ऐन २०७४ मा व्यवस्था भएको आधारमा सो माग गरिएको अभियन्ताका संयोजक केरुङले बताए ।
ज्ञापन–पत्र बुझ्दै नगर प्रमुख नेम्बाङले नगर क्षेत्रभित्रका अपभ्रंसित मौलिक स्थान, नामहरुबारे खोज, अनुसन्धानकार्य सुरु गरिसकेको बताउदै अनुसन्धानबाट प्राप्त तथ्यको आधारमा बाँकि काम गरिने बताए । त्यस्तै प्रमुख प्रशासकीय अधिकृत अधिकारीले पनि नगरपालिकाले यो क्षेत्रको मौलिक्ता नमेटिने गरी नगरपालिका अगाडि बढ्नुपर्ने र बढ्ने बताए ।
फिदिम नगरपालिकाको नवौं नगरसभा भने एक हप्तासम्ममा सुरु हुने फिदिम नगरपालिका, नगर कार्यपालिकाका प्रवक्ता तथा ३ नं. वडाका वडा अध्यक्ष नरेन्द्र गुरुङले बताए ।
Related