काठमाडाैं। मधेशी भन्दै हेपिएका प्रहरी सहायक निरीक्षक असई मणिकान्त झालाई मधेशी आयोगको विशेष दवावपछि पुनः सोही स्थानमा सरुवा गरिएको छ । आफूलाई अभियन्ता भन्दै प्रहरीलाई थर्काएका जवाला संग्रौलाका टिमलाई कारवाहीको लागि नेपाल प्रहरीलाई पत्राचार गरेका मधेशी आयोगका अध्यक्ष डा. विजय कुरा दत्तले झाको सरुवा पुनः सोही ठाउँमा गर्न दबाब दिएका थिए ।

सम्प्रादायिकता हिसाबले प्रहरी झासँग गरिएको व्यवहारलाई कानुनी अपराध बताउँदै आयोगका अध्यक्ष दत्तले प्रहरी महानिरीक्षकलाई फोन सम्पर्क मार्फत दुरव्यवहार गर्नेहरुलाई कारवाहीको दायरामा ल्याउन समेत निर्देशन दिएका थिए ।

असई झालाई केही सामाजिक अभियन्ताहरुले१ महिना अगाडि मधेशी हो । मधेश तिर जा भनेर हेपेको सम्बन्धमा भाइरल भएको भिडियो आयोगमा उजुरी आउन बित्तिकै माननीय अध्यक्षज्यूको निर्देशनानुसार दर्ता गरि सम्बन्धि निकायमा आवश्यक कारवाहीको लागि आयोगले पठाएको थियो ।

अध्यक्ष दत्तको फोन पश्चात प्रहरी सहायक निरीक्षक असई झालाई महाराजगंजबाट बग्गीखानामा गरिएको काज सरुवालाई फिर्ता गरि फेरि हिजो नै पुनः महानगरीय ट्राफिक, महाराजगञ्ज पठाइसकेको बताएका छन् ।

दोषीलाई कानूनी दायरामा ल्याउन आयोगले सिफारिस गरिसकेको र प्रक्रिया पनि अगाडि बढिसकेको अध्यक्ष दत्तले बताए । न्यूज ब्यूरोसँगको कुराकानीमा अध्यक्ष दत्तले बारम्बार यस्ता प्रकारको घटना भएको र विभिन्न निकायबाटै ढाकछोप भएपनि अब त्यस्तो नहुने प्रतिबद्धता जाहेर गरे ।

कुनै समुदायलाई अपमानजनक शब्द प्रयोग गरि होच्याउनु कानूनतः अपराध हो र यस्ता घटनाहरु प्रति माननीय अध्यक्षज्यू र अयोग सचेत रहेको समेत सबैमा विनम्र जानकारी गराउँछु ।

यस्ता घटनाहरु घटेमा आयोगको हेल्पलाइन ११५२, टोल फ्री १६६००११६१८५, फोन ०१–५२६११८५ मा सम्पर्क गरि उजुरी टिपाउन समेत आग्रह गरिएको छ ।

आफूलाई अभियन्ता भन्ने संग्रौलाको टिमले असई झालाई मधेशी भन्दै मधेशमै जा भनेर हेप्दै रंगभेदी व्यवहार गरेपछि अभियन्ताको चौतर्फी आलोचना भएको छ ।