लिम्बुवानखबर संवाददाता । प्रदेश १ सरकारका प्रमुख पर्शुराम खापुङबाट पेस भएको नीति तथा कार्यक्रम प्रदेशसभाबाट बहुमतले पारित भएको छ । आइतवार बसेको प्रदेशसभा बैठकले कार्यक्रम पारित गरेको हो ।
प्रदेश सभामुख प्रदीप कुमार भण्डारीले नीति तथा कार्यक्रम बहुमतले पारित गरेको घोषणा गरेका थिए । बैठकमा मुख्यमन्त्री राजेन्द्र कुमार राईले सांसदहरूले उठाएका प्रश्नहरूको जवाफ दिएका थिए ।
नीति तथा कार्यक्रममाथि एमालेका सांसदहरू हिकमत कुमार कार्की, जीवन घिमिरे, बुद्धिकुमार राजभण्डारी, रामबहादुर मगर र लिलाबल्व अधिकारीले संशोधन गर्ने प्रस्ताव राखेका थिए । प्रस्तावहरु बहुमतले अस्वीकृत भएपनि सांसदहरूले ती प्रस्तावहरु फिर्ता लिएनन् ।
यस्तै, असार १ गते बजेट पेस हुने बैठकमा २ बजे प्रदेशसभा बैठकमा उपस्थित हुन सांसदहरुलाई सभामुखले अनुरोध गरेका छन् । नीति तथा कार्यक्रममाथिको छलफलमा पूर्व मुख्यमन्त्रीद्धय शेरधन राई र भीम आचार्यसहित २० जना प्रदेशसभा सदस्यहरूले बोलेका थिए । छलफलमा उठेको जवाफ दिँदै मुख्यमन्त्री राईले राजनीतिक मतभेद र राजनीतिक विचार दृष्टिकोण फरक–फरक भए पनि प्रदेश १को विकासमा सबैदल एकताबद्ध भएर अघि बढ्न आग्रह गरे थिए ।
मुख्यमन्त्री राईले नीति तथा कार्यक्रम अनुसार नै बजेट आउने प्रष्ट पार्दै सरकारबाट भएका कमीकमजोरी औँल्याउनु सकारात्मक भए पनि प्रदेश सरकारले केही गर्दै गरेन भन्नु पूर्वाग्रही हुने उनले बताए । ‘पदमा भएपछि एउटा भाषा र पदबाहिर भए अर्को भाषा किन बोल्छौँ ?’ मुख्यमन्त्री राईले भने । बजेट तथा नीति कार्यक्रम साझा विषय भएकोले यसलाई मिलेर अगाडी बढाउनुपर्नेमा उनले जोड दिए ।