उर्लाबारी, ३ असार । मोरङको उर्लाबारीमा पहिलो पटक ३ दिने आदिवासी जनजाति फुड फेष्टिबल तथा सांस्कृतिक कार्यक्रम आजबाट शुरु भएको छ ।
आदिबासी जनजातिहरुको आर्थिक समृद्धिसँगै पहिचानलाई समाजमा स्थापित गर्ने उदेश्यले उक्त कार्यक्रमको आयोजना गरिएको हो ।
आदिवासी जनजाति महासंघ, नगर समन्वय परिषद्, उर्लाबारीको आयोजनामा उक्त कार्यक्रम भएको सचिव नारायण राईले बताए ।
उर्लाबारी नगरपालिकाका निवर्तमान नगर प्रमुख खड्ग फागोले उद्घाटन गरेको उक्त फेष्टिबलमा राई, लिम्बु, धिमाल, तामाङ, मगर, माझी, किरात, नेवार सहित स्थानीय जातजातिका मौलिकता सहित परम्परागत खानाका परिकारहरु राखिएको छ ।
प्रमुख अतिथि फागोले नगरको विकाशका लागि सबै जातजाति एक भएर लागिपर्नुपर्नेमा जोड दिनुभयो । यसैगरी कार्यक्रममा महासंघका सल्लाहकार रुद्रबहादुर तामाङ, शम्शेर लिम्बु सहित विभिन्न राजनीतिक दलका नगर प्रमुख सहितका वक्ताहरुले कार्यक्रमको सफलताको शुभकामना दिएका छन् ।
आदिवासी जनजाति महासंघ नगर समन्वय समितिका अध्यक्ष मणिलाल श्रेष्ठको अध्यक्षतामा भएको उक्त कार्यक्रममा विभिन्न जातजातिहरुले आफ्नो कला संस्कृति समिति प्रस्तुत गरेका छन् ।
कार्यक्रम असार ५ गते सम्म संचालन हुने आयोजकले जनाएको छ । सोही अवसरमा बैशाखमा सम्पन्न स्थानीय तहको निर्वाचनमा निर्वाचित आदिवासी जनजाति जनप्रतिनिधिहरुलाई सम्मान समेत गरिएको थियो ।
Related