दमक, १४ असार । इलामको माङ्सेबुङ –५ स्थित सरस्वती माध्यमिक बिद्यालयमा प्राविधिक कृषि शिक्षा बाली बिज्ञानको पठनपाठन शुरु भएको छ । सरस्वती माविले ०७७ सालदेखि सो बिद्यालयमा प्राविधिक शिक्षा पढाई सुरु भएको हो ।

पहिलो बर्ष कक्षा ९ मा मात्र अध्ययन अध्यापन भएको बिषय हाल कक्षा १० सम्म पढाई हुँदै आइरहेको छ । विद्यालयमा सो विषयमा अध्ययन गर्ने कक्षा ९ मा २१ जना र १० कक्षामा २१ जना विद्यार्थी रहेका छन् । एसइइ दिइसकेका ३३ जना विद्यार्थीले ओ.जि.टी तालिम लिइरहेको शिक्षक दिप्सन राईले बताएका छन् ।

पछिल्लो समयमा गाउँमै प्राविधिक शिक्षा पढ्न पाएकामा बिद्यार्थीहरु पनि खुशी छन् । उनले भने ‘सैद्धान्तिक शिक्षालाई ब्यवहारिक रूपमा देखाउने काम ओजिटिको रूपमा गर्नुपर्दछ ।’

प्राविधिक शिक्षा सञ्चालन गरेपछि पढाइका लागि बाहिर जानुपर्ने अवस्थाको अन्त्य भएको छ । गाउँमै बसेर विद्यार्थीले कम खर्चमै गुणस्तरीय प्राविधिक शिक्षा पढ्न पाएका छन् । गाउँपालिकाकै एकमात्र प्राविधिक कृषि बाली बिज्ञान सरस्वती माबिमा पठनपाठन हुँदै आइरहेको छ ।
गाउँमै प्राविधिक कृषि शिक्षा बाली बिज्ञान पढ्न पाउँदा विद्यार्थीहरु पनि खुशी भई प्राविधिक विषयप्रति चासो बढ्दै गएको साथै प्राविधिक शिक्षा लिँदा जागिर पाउन कुनै समस्या नहुने भएकाले पनि नयाँ विषयप्रति विद्यार्थीहरुको रुचि बढेको विद्यालय श्रोतले जनाएको छ ।

बाली बिज्ञान प्राविधिक शिक्षाको लागि पर्याप्त मात्रामा जग्गाको आवश्यक पर्ने गर्दछ । ब्यवहारिक रूपमा खेतिपाती गर्नुपर्ने भएकोले पनि पर्याप्त जग्गा चाहिने शिक्षक दिप्सन राईले बताए । “मौसमी र बेमौसमी खेतिको लागि आवश्यक जग्गा छ । तर, कागती, सुन्तला जस्ता बिरुवाको लागि लामो समयसम्म हेरचाह गर्नुपर्ने भएकोले बिद्यालयको आफ्नै जग्गा भए दिगो र ब्यवहारिक रूपमा अध्ययन गर्नका लागि कुनै कठिनाइ नहुने बताउँदै यस तर्फ विद्यालय व्यवस्थापन समितिको ध्यान जान आवश्यक रहेको छ” शिक्षक राईले भने ।