दमक, १ असार । पूर्व माननीय रेशम चौधरी असार ५ गते विर्तामोड आउने भएका छन् । नागरिक उन्मुक्ति पार्टी (एकीकृत) का संरक्षक समेत रहेका चौधरी पार्टीले आयोजना गरेको सम्मान तथा भेटघाट कार्यक्रममा आउन लागेका हुन् ।

पार्टीको प्रदेश नं. १ समितिले झापाको विर्तामोडस्थित सिटी सेन्टरमा जिल्लाका नेता कार्यकर्ताहरुको सहभागितामा उक्त कार्यक्रम हुने केन्द्रीय सदस्य तथा कोशी नाम खारेजी आन्दोलन परिचालन समिति प्रदेश नं. १ का संयोजक धनवहादुर पन्धाक सुब्बाले बताए ।

कार्यक्रममा संघीय अध्यक्ष ज्ञान बहादुर गुरुङ्, उपाध्यक्षहरु, माननीय लगायत नेताहरुको समेत सहभागिता रहने जनाइएको छ ।

टिकापुर घटनाको मुख्य अभियुक्त बनाई लामो समयदेखि राजबन्दी रहेका चौधरीलाई सरकार तथा मन्त्रीपरिषदको निर्णयमा गत जेष्ठ १५ गते गणतन्त्र दिवसको अवसरमा राष्ट्रपतिबाट आम माफि पाएर छुटेका हुन् ।

सुदुर पश्चिम, लुम्बिनी र मधेश प्रदेशको विभिन्न जिल्लाहरु, पालिकाहरुले आयोजना गरेको कार्यक्रममा सरिक भईरहेका चौधरी प्रदेश १ मा भने असार ५ गते विर्तामोडसँगै मोरङ्को ग्रामथान त्यसैगरी ६ गते सुनसरीको झुम्का र उदयपुरको गाइघाटमा कार्यकर्ताहरुसँग भेटघाट तथा अन्तरक्रिया गर्ने प्रदेश १ समितिले निर्णय गरेको हो ।