लिम्बुवानखबर। देशका विभिन्न स्थानहरुमा गत जेठ ३१ गतेदेखि असार १७ गतेसम्म बाढी र पहिरोमा परि ३२ जनाको मृत्यु भएको छ भने २७ जना घाइते भएका छन् भने २९ जनाको अवस्था अज्ञात छ ।

१९ दिनको अवधिमा १६१ परिवार बाढी र पहिरोको प्रकोपबाट प्रभावित भएका छन् भने २ करोड ४६ लाख बराबरको भौतिक सम्पत्ति क्षति भएको छ ।

गृह मन्त्रालयको राष्ट्रिय आपतकालीन कार्यसञ्चालन केन्द्रले उपलब्ध गराएको पछिल्लो १९ दिनको तथ्याङ्क अनुसार बाढी र पहिरोबाट ४२ जिल्ला प्रभावित भएका छन् ।

२०७७ सालमा यहि अवधिमा बाढी र पहिरोबाट २३ जनाको मृत्यु भएको थियो भने १८ जना घाइते भएका थिए । यो अवधिमा ३० जिल्लाका ६७ परिवार प्रभावित भएका थिए भने ७५ लाख २७ हजार बराबरको भौतिक क्षति भएको थियो । केन्द्रको तथ्यांकलाई हेर्दा यस वर्ष मनसुनको सुरुआती चरणमै गत वर्षको भन्दा बढी जनधनको क्षति भएको देखिन्छ ।

बाढी र पहिरोका कारण मृत्यु हुनेहरुमा सबैभन्दा बढी सिन्धुपाल्चोकमा ५ जनाको मृत्यु भएको छ भने २० जना अझै बेपत्ता छन् । डोटीमा ४ जना, रोल्पामा ३ जनाको मृत्यु भएको छ भने रौतहट, चितवन र तनहुँमा २–२ जनाको मृत्यु भएको केन्द्रको तथ्यांकमा उल्लेख छ । त्यस्तै पाँचथर, सप्तरी, सिन्धुली, काभ्रे, गोरखा, कास्की, पाल्पा, अर्घाखाँची, प्युठान, दाङ, जुम्ला, कालीकोट, बाजुरा र बझाङमा एक–एक जनाको मृत्यु भएको बताइएको छ ।

केन्द्रले मनसुनजन्य विपदमा परि मृत्यु, बेपत्ता र घाइते भएकाहरुको विवरण नेपाल प्रहरीले उपलब्ध गराएको तथ्यांकबाट अध्यावधिक गर्दै आएको जनाएको छ ।

जेठ २८ गते नेपाल भित्रिएको यस वर्षको मनसुन जेठ ३० गतेबाट देशभर फैलिएको थियो । यस वर्षको मनसुन अवधिमा नेपालमा सरदरभन्दा बढी पानी पर्ने प्रक्षेपण मौसमविदहरुले पहिल्यै सार्वजनिक गरेका थिए ।

राष्ट्रिय विपद जोखिम न्यूनीकरण तथा व्यवस्थापन प्राधिकरणका प्रमुख अनिल पोखरेलका अनुसार यस वर्षको मनसुन अवधिमा २३ जिल्लाका १७ लाख बासिन्दा बाढीबाट र २६ जिल्लाका १ लाख २० हजार बासिन्दा पहिरोबाट प्रभावित हुने आँकलन प्रधिकरणले गरेको छ ।

गत वर्षको सुक्खायाममा लागेको डढेलोले रूखपात र पानी सोस्न सक्ने क्षमता घटाइदिएको र उद्धार, पुनःस्थापना र प्रतिकार्यका अरु क्रियाकलापहरु कोभिड–१९ को सम्भावित संक्रमणबाट जोगिएर गर्नुपर्ने चुनौती रहेकाले पनि यस वर्षको मनसुनमा बढी जनधनको क्षति हुन सक्ने अनुमान प्राधिकरणले गरेको हो ।