काेराेना बिरूद्धकाे दाेस्राे डाेज खाेप लगाउँदै फाेनिज प्रदेश नं. १ का इन्चार्ज दिपीन राइ । तस्वीरः नेपाल पत्रकार महासंघ झापा

दमक, २६ असार । नेपाल पत्रकार महासंघ झापा शाखाको समन्वय र पहलमा शनिवार झापाका १ सय ६५ जना सञ्चारकर्मीलाई कोरोनाविरुद्धको खोपको दोस्रो डोज लगाइएको छ ।

स्वास्थ्य कार्यालय झापाको प्राविधिक टोलीले बिर्तामोडस्थित अतिथिसदनमा फ्रन्टलाइनर सञ्चारकर्मीलाई खोप लगाइ दिएको हो । गत असार १ गते भेरोसेल खोपको पहिलो डोज लगाएका सञ्चारकर्मीहरुलाई खोपको दोस्रो डाेज प्रदान गरिएको पत्रकार महासंघ झापा शाखा अध्यक्ष एकराज गिरीले जानकारी दिए ।

स्वास्थ्य कार्यालय झापाका निमित्त प्रमुख ईश्वरीप्रसाद पौडेलको नेतृत्वमा आएको प्राविधिक टोलीले सञ्चारकर्मीलाई खोप लगाइए दिएको हो । जनस्वास्थ्य अधिकृत समीक्षा पराजुली, सिआइसीटी सहजकर्ता भवानी राय, सिनयर अहेव उकिलबहादुर खड्काले खोप लगाउने कार्यमा प्राविधिक सहयोग गरेका थिए ।

महासंघ झापाले हालसम्म खोप लगाउन छुटेका जिल्लाका सञ्चारकर्मीलाई तत्काल खोपको व्यवस्था गर्न आग्रह गरेको छ । खोप लगाउन छुटेका सञ्चारकर्मीलाई प्राथमिकता राखेर अबको चरणमा खोप प्रदान गरिने स्वास्थ्य कार्यालयका निमित्त प्रमुख पौडेलले प्रतिबद्धता जनाए ।

सञ्चारकर्मीलाई खोप लगाउने कार्यमा समन्वय र सहयोग गर्ने डीसीसीएमसी झापा लगायत सबैलाई महासंघ झापा शाखाले धन्यवाद ज्ञापन गरेको छ ।