इलाम। उच्च अदालत विराटनगर, इलाम इजलासमा कार्यरत कार्यालय सहयोगी विमलाकुमारी पराजुलीको हत्या आरोपमा प्रहरीका असई युवराज बानियाँ पक्राउ परेका छन् । बनियाँ सोही इलाम इजलासका न्यायाधीस शिवनारायण यादवका बडीगार्ड हुन ।

प्रारम्भिक अनुसन्धानबाट महिलाको हत्यामा बानियाँको संलग्नता देखिएको जिल्ला प्रहरी कार्यालय इलामका प्रहरी उपरीक्षक महेन्द्र श्रेष्ठले जानकारी दिए ।

बानियाँले ४८ वर्षीय पराजुलीको घाटी थिची हत्या गरेको र शव अदालत परिसरको झाडीमा लुकाएको अनुसन्धानबाट खुलेको छ । दुवैबिच अवैध सम्बन्ध रहेको र आर्थिक लेनदेनको विषयमा विवाद हुँदा हत्या भएको बताइएको छ ।

अनुसन्धानको क्रममा बानियाँले पराजुलीको हत्या आइतबार साँझ गरेको स्वीकार गरेका छन् । बानियाँ अदालत परिसर भित्रै क्वाटरमा बस्दै आएका थिए । उनलाई थप अनुसन्धानको लागि म्याद थप गरी पत्रकार सम्मेलन गरी सार्वजनिक गरिएको छ ।

बानियाँ २०७३ सालदेखि उच्च अदालत विराटनगर, इलाम इजलासका न्यायाधीस यादवको बडी गार्डको रुपमा कार्यरत थिए ।