काठमाडौं, ३ साउन । सर्वोच्च अदालतको आदेशबाट दोस्रो पटक विघन भई पुनःस्थापित प्रतिनिधिसभाको बैठक आज बस्दैछ । आठौं अधिवेशनको पहिलो बैठक अपराह्न चार बजे बस्ने भनिएको छ ।

आजको बैठकमा करीब साढे तीन वर्ष सत्तामा रहेको नेकपा एमाले भने प्रतिनिधिसभा बैठकको प्रमुख प्रतिपक्षीको हैसियतमा देखिने भएको छ ।

तत्कालीन प्रधानमन्त्री केपी शर्मा ओलीको सिफारिशमा राष्ट्रपति विद्यादेवी भण्डारीले दोस्रो पटक विघटन गरेको प्रतिनिधिसभालाई पुनर्स्थापित गर्न सर्वोच्च अदालतको संवैधानिक इजलासले असार २८ गते परमादेश जारी गरेको थियो ।

संघीय संसद सचिवालयले तयार पारेको सम्भावित कार्यसूचीअनुसार आइतबार ओली नेतृत्वको सरकारले १६ वटा अध्यादेश जारी गरेको थियो । ति मध्ये बजेटसँगै केही विधेयकहरुलाई प्रक्रियामा लाने संकेत देखिएको छ ।

अर्थमन्त्री जनार्दन शर्मा (प्रभाकर)ले अध्यादेशबाट ल्याइएको बजेट संसदमा पेश गर्ने जानकारी यसअघि नै बताइसकेका छन् । यद्यपि आइतबारको पहिलो बैठकको कार्यसूची भने बिहान १० बजे बस्ने कार्यव्यवस्था परामर्श समितिको बैठकले टुंगो लगाउने छ ।

चालु अधिवेशन बाटनै प्रधानमन्त्रीमा शेरबहादुर देउवाले विश्वासको मत लिने बताइएको छ । यद्यपी कहिले विश्वासको मत लिने टुङ्गो नलागेको बताइएको छ ।