काठमाडौं, १२ साउन।  लुम्बिनी प्रदेश सरकारमा सहभागी भएको भन्दै जनता समाजवादी पार्टी, नेपालका तीन प्रदेश सांसदलाई पार्टीबाट निष्कासित गरेको छ । मुख्यमन्त्री शंकर पोखरेल नेतृत्वको सरकारमा सहभागी सांसदहरुलाई मंगलबार बालकुमारीमा बसेको केन्द्रीय समिति बैठकले निष्कासित गर्ने निर्णय गरेको हो ।

जसपाद्वारा निष्कासित हुने सांसदहरुमा विजयबहादुर यादव, कल्पना पाण्डे लम्साल र सन्तोष पाण्डे रहेका छन् । उनीहरुलाई निस्कासित गरेसँगै प्रदेश सांसद पद रिक्त राखिदिनका लागि जसपाले त्यहाँका प्रदेश सभामुखलाई पत्र लेख्ने निर्णय पनि लिएको छ ।

जसपाको निर्णयानुसार उनीहरुको सांसद पद रिक्त भएमा अबको ६ महिना मात्रै मन्त्रीका रुपमा रहन सक्नेछन् । जसपाको यो निर्णयले लुम्बिनी प्रदेशमा एमाले नेतृत्वको सरकारलाई भने समस्या हुने देखिएको छ ।