दमक, ११ साउन । प्रदेश नं. १ को कोशी नाम खारेजी आन्दोलनका क्रममा सहिद भएका पदम कुमार लिम्बु लाजेहाङको आमाको निधन भएको छ ।
बिक्रम सम्वत २०१५ साल भदौं चार गते तेह्रथुममा जन्मिएकी धनमाया लिम्बुको ६७ बर्षको उमेरमा साउन १० गते निधन भएको हो ।

केही दिन देखि धरानस्थित विपि मेमोरियल अस्पतालमा उपचार गरिरहनु भएका लिम्बुको अस्पतालबाट रिफर भई बेलबारीस्थित घरमा आइपुग्दा उनको निधन भएको थियो ।

प्रदेश नं. १ पुनः नामाङकन संयुक्त संघर्ष समितिको विराटनगरमा २०७९ साल चैत्र ५ गते भएको बृहत जनप्रदर्शनको क्रममा कोशी नाम खारेजी आन्दोलनमा घाइते भई वैशाख ९ गते पदम लिम्बुको निधन भएको थियो । सरकारले लिम्बुलाई राष्ट्रिय सहिद घोषणा गरेर १० लाख क्षतिपुर्ति समेत प्रदान गरेको छ ।

लिम्बु संघीय लोकतान्त्रिक राष्ट्रिय मञ्चको सचिवालय सदस्य तथा लिम्बुवान भोलेन्टियर्सका केन्द्रीय सहकमाण्डर समेत थिए ।

आमा धनमायाको याक्थुङ मुन्धुमको धार्मिक परम्परा अनुसार आइतबार (आज) छोरा लाजेहाङको समाधिस्थल नजिक अन्तेष्टि गरिएको छ ।