काठमाडौं, २५साउन । आज अगष्ट ९ तारिख २७औं विश्व आदिवासी दिवस संसारका आदिवासीहरुले ‘कसैलाई पछाडि नछाडौँ : आदिवासी जनजाति र नयाँ सामाजिक सम्झौताका लागि आह्वान’ भन्ने नाराका साथ भव्य रुपमा मनाउँदै छन् ।

यसै क्रममा प्रधानमन्त्री एवं नेपाली काङ्ग्रेसका सभापति शेरबहादुर देउवाले अल्पसङ्ख्यक र सीमान्तकृत समूहको अधिकारलाई सुनिश्चित गर्न सरकार सदैव प्रतिबद्ध रहेको बताएका छन् ।

‘विश्व आदिवासी दिवस’का अवसरमा नेपाल र नेपालबाहिर बस्नुहुने सम्पूर्ण नेपाली आदिवासी दिदीबहिनी तथा दाजुभाइहरूमा शुभकामना दिदै प्रधानमन्त्रीले दिवसले सम्पूर्ण आदिवासीहरूको अधिकार र मुद्दालाई सम्बोधन गर्दै संसारभरका आदिवासी समुदायलाई एकै सूत्रमा बाँध्ने उल्लेख गरेका छन् ।

नेपाल सरकारले सन् २००७ सेप्टेम्बर १३ मा आदिवासीहरूको अधिकारसम्बन्धी अन्तर्राष्ट्रिय श्रम सङ्गठन १६९ को प्रावधानलाई अनुमोदन गरिसकेको र सो अनुसार सरकार महासन्धिलाई कार्यान्वयन गर्न सरकार पूर्ण प्रतिबद्ध रहेको प्रधानमन्त्री देउवाको रहेको छ ।

नेपालमा पछिल्लो समय आदिवासीहरुमा सांस्कृतिक पुनःउत्थान भएतापनि भाषिक, राजनीतिक, संघीयता र सह–अस्तित्वको मुद्दामा कमजोर हुँदैगएको विश्लेषणहरु हुँदै आएको छ । आदिवासीहरुको मागहरु नारामै सिमित भएको भन्ने आवाजहरु समेत गुन्जन थालेको हुँदा नेपाल आदिवासी जनजाति महासंघले यस प्रति सचेतनामूलक कार्यक्रमहरु गर्दै अघि बढ्नु पर्ने आदिवासी विश्लेषकहरुको भनाई रहेको छ ।