काठमाडौं । थरुहट थारुवान राष्ट्रिय मोर्चाले सांसद रेशम चौधरीसहित टीकापुर घटनाका राजबन्दीहरुलाई रिहाइ गर्न सरकारसँग माग गरेको छ । सोमबार मोर्चाले विज्ञप्ति जारी गर्दै २०७२ भदौ ७ गते कैलालीको टीकापुरमा थारु विद्रोहका क्रममा भएको घटनाका बन्दीहरुलाई सम्मानजनक रिहाइ गर्न माग गरेको हो ।

सबै जनसंघर्ष र जनविद्रोहलाई राज्यले शान्ति प्रक्रियाको अवधिमा मान्यता दिएर संविधान निर्माण गरेको भए पनि टीकापुर घटनालाई राजनीतिक तवरले समाधान नगरी आपराधिक करार गरेर निर्दोश थारुहरुलाई अपराधी ठहराउन नमिल्ने मोर्चाको ठहर छ ।

टिकापुरमा थारुहट प्रदेश माग राख्दै ३० हजार जनमासको विशाल आमसभामा षडयन्त्रपूर्ण ढंगबाट सभालाई विथोल्दै मोर्चाको कार्यक्रमलाई विथोल्ने तत्वहरुको उचित छानविन गर्न मोर्चाले सरकारसँग माग गरेको छ । टीकापुर विद्रोहलाई कुनै दोहोरो मापदण्ड नअपनाई राजनीतिक तवरबाट टुंग्याउनुपर्ने मोर्चाको माग छ । लोकतान्त्रिक मुल्य र मान्यतालाई पालना गर्दै आफ्नो पहिचानको लागि प्रदेशको नामाकरण थरुहट भनेर राख्न गरिएको जनसभामा घुसपैठ गरी थारु आन्दोलनलाई निस्तेज गर्ने षडयन्त्र गर्दै निर्दोस नागरिक हत्या गरी थारुहरुलाई हत्यारा दर्ज गर्ने प्रपञ्चकारीहरुलाई राज्यले शरण दिएको थारु अगुवाहरुको निश्कर्ष रहेको छ ।

मोर्चाद्वारा जारी विज्ञप्तिमा भनिएको छ, ‘‘टीकापुर जनविद्रोह केवल टीकापुर र थारुहरुको मात्र विद्रोह नभई सबै किसिमको शोषण, उत्पीडित र समानताको माग यस जोडिएको हुँदा राज्य पुनर्संरचना र संघीय सीमांकनको अपुरो कार्यलाई पूर्णता दिने पेचिलो राजनीतिक मुद्दा हो । त्यसैले टीकापुर घटनाका राजबन्दीहरु सिंगो देशलाई लोकतान्त्रीकरण गर्ने कार्यभार बोकेका आस्थाका बन्दीहरु हुन् ।’’

थारु विद्रोहका क्रममा पक्राउ परेका माननीय रेशम चौधरी लगायत राजबन्दीको रिहाइ लगायतका माग राख्दै मोर्चाले मंगलबारदेखि तीन दिनसम्म काठमाडौंको माइतीघरमा ‘थारु प्रदर्शन’ गर्ने विज्ञप्तिमा जनाएको छ ।

बिज्ञप्ति हेर्नुहाेस्ः