काठमाडौं, ३ भदौं । अफगानिस्तान विद्रोही तालिबानले कब्जा गरेपछि देश छाडेका राष्ट्रपति असरफ घानी संयुक्त अरब इमिरेट्स (युएई)को शरणमा पुगेका छन् ।

युएईका परराष्ट्र मन्त्रालयले घानी र उनको परिवारका सदस्यलाई मानवीय दृष्टिले आफ्नो देशमा स्वागत गरिएको जनाएका छन् ।

अफगानिस्तानको राजधानी काबुलमा तालिबान लडाकुहरु प्रवेश गरे पश्चत घानीले आइतबार देश छाडेका थिए । शुरुमा घानी देश छोडेर ताजिकिस्तान भागेको समाचार सार्वजनिक भएको थियो ।

अन्तर्राष्ट्रिय समाचार एजेन्सीहरुका अनुसार ७२ वर्षीय राष्ट्रपति घानीले आफू छिट्टै अफगानिस्तान फर्किने त्यसको लागि छलफल भइरहेको जनाएका छन् ।

राष्ट्रपति घानीले ठूलो रकम लिएर देश छोडेको भन्ने समचारको खण्डन गर्दै त्यसमा कुनै सत्यता नभएको प्रष्टाएका छन् । ताजकिस्तानका लागि अफगानिस्तानका राजदूत मोहम्मद जहीर अगबरले घानीले देश छोड्ने बेला करिब करोडौं डलर रकम पनि सँगै लिएर गएको दाबी गरेका थिए ।

भारतीय मिडियाहरुले पनि बोराका बोरा रकम लगेको र नअट्ने भएपछि केही रकम निवासमै छाडेको समाचार लेखेका थिए । तर यो समाचारको कुनै पुष्टि भएको छैन ।