लिम्बुवानखबर, ६ भदौं । आज हिन्दु धर्मावलम्बी तागाधारीहरुले रक्षाबन्धन तथा जनैपूर्णिमा (ऋषि तर्पणी) श्रावण शुक्लपूर्णिमा पर्व देशभर मनाइँदैछन । परम्परा अनुसार वैदिक सनातन धर्मावलम्बीहरुले आजका दिन नदी, ताल, तलाउ, पोखरीमा गई अथवा एकाविहान स्नान गरेर गुरु पुरोहितबाट रक्षासूत्र बाँध्ने परम्परा रहेको छ ।
तागाधारीले गुरु पुरोहितले विधिपूर्वक मन्त्रिएको यज्ञोपवीत एवं डोरो (रक्षासूत्र) धारण गरेमा नकारात्मक तत्वबाट सुरक्षा प्राप्त हुने धार्मिक विश्वास गरी आज जनै फेर्ने गर्छन् ।
रक्षाबन्धन गर्ने बेलामा गुरु पुरोहितले ‘येन बद्धो बलिराजा दानवेन्द्रो महाबल तेन त्वां प्रतिबध्नामि रक्षेमा चलमाचल’ भनी रक्षासूत्र, रक्षाबन्धन अथवा डोरो बाँध्ने वैदिक परम्परा रहेको नेपाल पञ्चाङ्ग निर्णायक समितिका पूर्वअध्यक्ष एवं धर्मशास्त्रविद् प्रा डा रामचन्द्र गौतमले जानकारी दिए । मानव रक्षाका लागि जप, तप र पूजा गरी मन्त्रिएको रक्षाबन्धन अर्थात् डोरो वैदिक परम्पराको मन्त्रोच्चारण गर्दै ब्राह्मण पुरोहितले यजमानको दाहिने नाडीमा बाँधिदिने गरिन्छ ।
रक्षाबन्धन बाँध्न वा नयाँ जनै फेर्न आज बिहानैदेखि पशुपतिनाथ मन्दिर परिसर, वसन्तपुरस्थित अशोक विनायकलगायत वाग्मती नदीको किनार र काठमाडौं उपत्यकालगायत देशभरका सबै हिन्दु मठमन्दिरमा भक्तजनको भीड लाग्ने गर्छ । यस वर्ष नयाँ कोरोना संक्रमणको जोखिम कायमै रहेकाले भौतिक दूरी कायम गरी सांस्कृतिक पर्व मनाउन सरकारले आह्वान गरेको छ ।
आज जनैपूर्णिमाका दिन एघार थरीका गेडागुडी मिसाई भिजाएर टुसा उमारेर बनाइएको क्वाँटी खाने चलन छ । क्वाँटी बनाइ खानाले शरीरमा रोग नलाग्ने, पेट सफा हुने र वर्षायामभर खेतीपातीको काम गर्दा शरीरमा लागेको विभिन्न रोगव्याथी निको हुने धार्मिक एवं आयुर्वेद शास्त्रीय मान्यता छ । यसबाट चिसो गाडिएर लाग्ने रुघाखोकी जस्ता रोग पनि निको हुने उनले बताए ।
यसरी नै नेपालको तराई क्षेत्रमा भने आजकै दिन दिदीबहिनीले दाजुभाइलाई राखी बाँधेर मनाउने चलन रहेको छ । दिदीबहिनी र दाजुभाइकाबीचको सम्बन्धलाई सुमधुर बनाउछ भन्ने यो परम्पराको सामाजिक मान्यता रहेको छ । यस पर्वको अवसरमा आज सरकारले सार्वजनिक बिदा दिएको छ । विगत वर्षमा सरकारले यस दिनको बिदालाई हटाएको थियो ।
Related