दमक, २ भदौं । संघीय लोकतान्त्रिक राष्ट्रिय मञ्च प्रदेश र प्रतिनिधिसभा निर्वाचन लक्षित गर्दै चुनावमा होमिन्ने तयारी गर्दै बैठक बस्न लागेको बताइएको छ । मञ्चका अध्यक्ष कुमार लिङदेन मिराकले आगामी मंसिर ४ गते हुने दुवै चुनावमा पार्टी सहभागी हुने प्रष्ट पार्दै बैठक बस्न लागेको बताएका छन् ।

मञ्चको यहि भदौं ३ र ४ गते धरानस्थित हरियाली भवनमा मञ्चको संघीय समिति सदस्यहरू, प्रदेश १ समन्वय समिति र लिम्बुवान, किरात/खम्बुवान, शेर्पालुङ र दलित प्रान्तीय समितिको संयुक्त बैठक बस्न लागेको हो ।

मञ्चले ७४ को चुनावमा केन्द्रमा ३ प्रतिशत थ्रेस होल्ड कटाउन सकेन । त्यसैगरी ६ वटा प्रदेशहरुमा कुनै चुनाव जित्न नसकेपनि प्रदेश नं. १ मा समानुपातिक तर्फ १ जना सदस्य पठाएको छ । प्रदेश नं. १ मा मञ्चले प्रदेश थ्रेसहोल्ड कटाएको थियो ।

पहिचानवादी पार्टीको रुपमा २०६२ सालमा स्थापना भएको यो पार्टी निरन्तर संघीयताको पक्षमा राजनैतिक आन्दोलन गरिरहेको दल हो । संविधान पुनःलेखन गर्दै १०+१ प्रान्त निर्माण गर्नुपर्छ भन्दै चरणबद्ध आन्दोलन गरिरहेको दल यतिबेला प्रदेश नं. १ को नामाकरण सम्बन्धि आन्दोलनमा केन्द्रित भएको महासचिव अशोक चेम्जोङ् बताउँछन् । किरात याक्थुङ चुम्लुङको समन्वयमा बनेको लिम्बुवान, किरात संयुक्त संघर्ष समितिको मुख्य १ घटकको रुपमा मञ्च रहेको उनले बताए ।

बैठकले आगामी मंसिर ५ को चुनावमा मञ्चबाट कसरी चुनावमा सहभागी हुने भन्ने बारेमा ब्यापक छलफल गरी र निर्वाचन परिचालन समिति लगायत विभिन्न उपसमितिहरु निर्माण गरिने महासचिव चेम्जोङले लिम्बुवान खबरलाई बताएका छन् ।