दमक, २८ साउन । धरान खानेपानी व्यवस्थपन समितिले गरेको खानेपानी महसुल वृद्धिको निर्णयबाट धरान उपमहानगरपालिका पछि हटेको छ ।

आइतबार राति अबेरसम्म चलेको १० दलका प्रतिनिधि र नगरप्रमुख हर्क साम्पाङ त्यसैगरी उपप्रमुख, वडाध्यक्षहरुको उपस्थितिबीच भएको वार्तामा महसुल वृद्धिको निर्णय फिर्ता लिने लगायतका तीन बुँदे सहमति भएको हो ।

वार्तामा खानेपानी महसुलमा गरिएको वृद्धि तत्काललाई फिर्ता लिने, सात दिन भित्र खानेपानी बोर्डको हिसाब सार्वजनिक गर्ने र बोर्डको पूर्णताबारे उच्च अदालतको फैसला मान्ने सहमति भएको वार्तामा सहभागी प्रतिनिधि अमर इमजले जानकारी दिए ।

यो सहमतिसँगै तीन सातादेखि आन्दोलनमा उत्रिएका दल र स्थानीय उपभोक्ताले आन्दोलनका सबै कार्यक्रम फिर्ता लिएका छन् ।
आइतबार दिउँसो साढे २ बजेदेखि सुरु भएको वार्ता राति अबरेसम्म चलेको थियो । उपमहानगरपालिका कार्यालयभित्र वार्ता भइरहेका बेला बाहिर आन्दोलनरत उपभोक्ता र दलका प्रतिनिधिहरुले विभिन्न नारा लगाउँदै धर्ना दिएका थिए ।

वार्ताको सहमतिपत्रमा नगरका प्रमुख हर्कराज राई, उपप्रमुख आईन्द्रविक्रम वेघा, १८ नं. वडाध्यक्ष नरेन्द्र कुमार राई, १७ि नं. वडाध्यक्ष सुर्य बहादुर भट्टराई, नेपाली कांग्रेस नगर सभापति श्याम पोख्रेल, एमालेका हर्कजंग एभेङ, नेकपा माओवादीका चोत्लुङ्, जसपा नेपालका सुमन चेम्जोङ, नेकपा एसका रेवती रमण राई, रास्वपाका ठाकुर बहादुर कार्की, राप्रपाका विनोद कोइराला, नाउपाका अमर इजम,, लिम्बुवानका मोहन लिम्ब, राष्ट्रिय साझा पार्टीका भूपि कोयू, डिएसपि मान बहादुर राई, डिएसपी शसस्त्र हेम मौडेल, नेपाल पत्रकार महासंघ सुनसरी जिल्ला सभापति जनक ऋषि राई र खानेपानी व्यवस्थापन समितिका निर्देशक राजु पोख्रेलले हस्ताक्षर गरेका छन् ।